ولسمشر غني وايي نوماندان دې د کمیسیونونو خپلواکۍ ته درناوی وکړي.
له ټاکنو وړاندې دې هیڅ نوماند د بریا ادعا نه کوي او د ټاکنیزو کمېسیونونو خپلواکۍ او پریکړو ته دې درناوی وشي.
ولسمشر محمد اشرف غني دا څرګندونې نن ماسپښین د سویلي او مرکزي اسیا لپاره د امریکا بهرنیو چارو وزارت مرستیالې الیس ویلز سره د لیدو په مهال وکړي
د ارګ اعلامیه کې راغلي چې دواړو لوریو د ټاکنو، سولې، امنیت او د سیمه ییزو اړیکو پر سر خبرې اترې وکړې.
ولسمشر همداراز ویلي، د باعزته سولې لپاره سرتاسري اجماع جوړه شوې او د سولې پروسه د اوسني او راتلونکي حکومت له لومړیتوبونو ده.
په همدې حال کې د نوماندانو شورا په یوه غونډه کې پرېکړه کړې چې د ملګرو ملتونو امنیت شورا ته شکایت وکړي.
د نوماندانو شورا نن په یوه خبري غونډه کې وویل، حاکمو ټیمونو ولسواکي، ټاکنې او په حکومت کې ټول فعالیتونه انحصار کړي دي.
ددوی په باور دغه ټیمونو په تېرو ولسمشریزو ټاکنو کې پراخه درغلي کړې ده او اوس هڅه کوي غیرقانوني او باطلو رایو ته شفافیت ورکړي.
د ولسمشریزو ټاکنو نوماندانو دغه راز ویلي چې په افغانستان کې د ولسواکۍ د اوسني وضعیت، ټاکنو، درغلیو او د حکومتي چارواکو له غیر قانوني کړنو به د ملګرو ملتونو امنیت شورا ته شکایت کوي او د ولسواکۍ د اوسني وضعیت په اړه به اندېښنه ورسره شریکوي.
دوی همدا راز پر ټاکنیزو کمیسیونونو غږ وکړ چې هېڅ ډول فشار ته دې تسلیم نه شي، شفافیت دې په پام کې ونیسي، د خلکو رایو ته دې درناوی وکړي او له خپلو صلاحیتونو دې کار واخلي.
