کابل کې د زورواکو پرضد د پولیسو کمپاین هرکلي سره مخ دی.
کورنیو چارو وزارت کابل ښار کې د درې سوه موټرو تورې ښيښې پاکې کړي او لسګونه ميله بې جوازه وسلې یې راټولې کړي.
کورنیو چارو وزارت مالومات ښيي چې کابل ښار کې د جرمونو ګراف پنځه څلوېښت سلنه راټیټ شوی او یو سل شل هغه موټر یې نیولي چې اسنادونه یې نه درلودل.
د ولسي جرګې غړي او ښاریان بیا ټینګار لري، چې قانون دې په ټولو یو شان پلې شي او هیڅوک دې ترې مستثنی نه وي.
په کابل ښار کې د عامه نظم او د امنیت د ښه والي په موخه کورنیو چارو وزارت د موټرو تورې ښيښې پاکوي، غیر قانوني وسلې او بې اسناده موټر نیسي.
کورنیو چارو وزارت مالومات ښيي تر دې مهاله یې لسګونه میله وسلې او یو سل شل موټر نیولي چې غیر قانوني توګه به ښار کې تګ او راتګ کوه .
که څه هم د ولسي جرګې ځینې غړي له دې کمپاین راضي نه دي خو ځینې نور بیا د کورنیو چارو وزارت دې اقدام ته خوښ دي او غوښتنه لري چې قانون دې په ټولو یو شان پلې شي.
کورنیو چارو وزارت مالومات ښيي چې په کابل ښار کې اکثره پلان شوي جرمونه د تورو ښیښو لرونکو، بې اسنادو او غیر قانوني پوځي وسایلو لرونکو موټرو لخوا ترسره کېږي.
