افغانستان د انساني قاچاق تر ټولو بدو هېوادونو نوملړ کې راغلی

له کلونو راهيسې ډېری افغانان د قانوني لارو ترڅنګ پر قاچاقي لارو بهر  او  په ځانګړي ډول اروپايي هېوادونو ته د تلو هڅې کوي.

که څه هم په قاچاقي لارو نورو هېوادونو ته د تګ موضوع نوې نه ده، خو د انساني قاچاق په اړه د امریکا بهرنیو چارو وزارت په کلني راپور کې افغانستان د هغو ۱۱ تر ټولو بدو هېوادونو په نوملړ کې یاد کړی، چې خلک ترې په قاچاقي لارو بهر ته ځي.

په راپور کې ويل شوي، په وروستيو کلونو کې د افغانستان سرپرست حکومت له دې هېواد څخه د انساني قاچاق مخنیوي لپاره هېڅ راز هڅې نه دي کړي او ډېری افغانان په افغانستان کې د حاکم وضعيت له امله د خپل هېواد پرېښودو ته اړ شوي دي.

د راپور یوه برخه:« د ۲۰۲۳ کال د انساني قاچاق په اړه راپور کې د افغانستان په ګډون ۱۱ هېوادونه بدترین حالت کې دي. افغانستان په بشپړه توګه د قاچاق له منځه وړلو لپاره هېڅ معیارونه نه دي پوره کړي او طالبانو هم د قاچاق د مخنیوي لپاره د کومې هڅې خبر نه دی ورکړی، نه یې د عامه پوهاوي هڅه کړې او کورنیو چارو وزارت کې د قاچاق پر ضد اداره چې په اصل کې په دې تړاو د قوانینو د عملي کولو مسوولیت لري، تش په نامه یوه اداره ده.»

دغه راپور کې د انساني قاچاق ډېری قربانیان ماشومان ښودل شوي او په کې زياته شوې، چې ياد قرباني ماشومان  یو ډول درنو کارونو ته  اړ کړی شوي دي.

راپور کې وړاندې راغلي،چې د اسلامي امارت له واکمنیدو وروسته، د هغو ماشومانو شمېر ۲۵ سلنه پورته شوی دی،چې درانه کارونه کوي.

د راپور یوه برخه :« د افغانستان د قاچاق ډېری قربانیان ماشومان دي چې دوی غالۍ اوبدنې، د خښتو بټیو، کورنۍ غلامۍ، جنسي قاچاق، د څارویو ساتلو، سوالګرۍ، د کوکنارو کښت، د مالګې کان کیندنې، د نشه‌يي توکو قاچاق، وسلو قاچاق او د لارۍ چلولو لپاره اړ کړل شوي دي. د ملګرو ملتونو د کارپوهانو په وینا د طالبانو له واکمنېدو وروسته د ماشومانو له لوري کار زیات شوی او ۲۵ سلنه ماشومان درانه کارونه کوي.»

په ورته مهال دې وزارت په خپل کلني راپور کې دا هم ویلي، چې په بهرنیو هېوادونو کې افغانان سختو کارونو ته اړ کړل شوي او په ډېرې سختۍ ځان ته کار پیدا کوي، خو له دې وېرې چې ښايي بيا به خپل هېواد ته وشړل شي، چوپ خوله پاتې کېږي.

د  راپور یوه برخه :« افغانان په نورو هېوادونو او په ځانګړي ډول په  ایران، پاکستان، یونان، ترکیې، اروپايي او خلیجي هېوادونو کې د کرنې او ساختماني چارو په برخه کې اجباري کارونو ته اړ کېږي. دوی هلته د کار موندنې لپاره منځګړو ته پيسې ورکوي او آن د دې لپاره جنسي قاچاق ته مجبورېږي. که څه هم افغانان هلته په  بد وضعیت کې دي، خو خپل هېواد ته د شړلو د  ویرې له امله چوپ پاتې دي.»   

که څه هم امریکا د انساني قاچاق په برخه کې د ۱۱ بدترینو هېوادونو اصلي لاملونه جبري کارونه، ناسم اقتصادي وضعیت، د وسلوالو ډلو فعاليت او ځینې نور یاد کړي، خو شنونکي په افغانستان کې د کډوالی او بهر ته د تلو ستر لامل فقر بولي.

د  اسلامي امارت ویاند ذبیح الله مجاهد بیا  د افغانستان په تړاو د امریکا د بهرنیو چارو وزارت دا راپور په کلکه ردوي او وايي، د اسلامي امارت له بيا واکمنېدو سره له افغانستان څخه انساني قاچاق نه  دی زيات شوی.

افغانستان داسې مهال د انساني قاچاق له مخې د بدترینو هېوادونو په قطار کې راځي، چې په دې وروستیو کې افغان کډوال د پاکستان، ایران او ترکیې په ګډون ګڼو هېوادونو کې وهل ډبول شوي، وژل شوي او او په زور بېرته افغانستان ته را ډیپورټ شوي دي.