نړۍ کې د کډوالو شمیر د ریکارډ کچې ته لوړی شوی

که څه هم کډوال بهر هېوادونو ته د تلو پر مهال له ګڼو ستونزو سره مخ کیږي، خو بیا هم ډېری کسان د هر ډول خطرونه په منلو سره هڅه کوي، د ښه ژوند په لټه نورو هېوادونو ته ولاړ شي.

د ملګرو ملتونو د کډوالۍ سترې کمېشنرۍ په یوه راپور کې ویلي،په نړيواله کچه په زور د بې ځایه شویو کډوالو شمېر د ریکارډ تر کچې لوړی شوی او دا شمېر په اوس کې له ۱۱۰ میلیونو کسانو هم اوښتی دی.

د راپور یوه برخه:« د ۲۰۲۲ زېږدیز کال تر وروستیو پورې ۱۰۸.۴ میلیونه کسان په نړیواله کچه په زور بې ځایه شوي دي. د ملګرو ملتونو د کډوالۍ سترې کمېشنرۍ د وړاندوينې له مخې، دغه شمېر د ۲۰۲۳ کال مې میاشت کې له ۱۱۰ میلیونو کسانو هم اوښتی دی.»

راپور کې  جګړه، تاوترخوالی، د بشري حقونو نقض او نورو ورته د کډوالو د زياتوالي اصلي لاملونه ياد کړي او ویلي يې دي، دامهال په هرو ۷۴ تنو کې یو هغه یې ګډوال او هم بې ځایه شوی دی.

د راپور یوه برخه:« جګړو، تاوترخوالي، د بشري حقونو نقض او نورو ورته لاملونو میلیونونه کسان د خپل هېواد پرېښودو ته اړ کړي دي.  ۲۰۲۲ کال کې د ۲۰۲۱ کال په پرتله د کډوالو په شمېر کې ۲۱ سلنه زیاتوالی راغلی دی، چې اوس د ځمکې پر مخ د هرو ۷۴ کسانو څخه یو هغه یې کډوال دی.»

د کډوالو سترې کمېشنرۍ په راپور کې سوریه لومړنی، اوکراین دویم او افغانستان درېیم هېواد یاد کړي دي، چې ډېر خلک ترې کډوال شوي دي.

دغه راز په راپور کې راغلي، چې یوازې همدا یاد هېوادونه د نړۍ ۵۲ سلنه کډوال جوړوي.

د راپور یوه برخه:« په ټولیز ډول د ټولو کډوالو او نورو هغو خلکو له ډلې چې نړیوال خونديتوب ته اړتیا لري ۵۲ سلنه یې یوازې درېیو هېوادونو دي. له دې ډلې ۶.۵ میلیونه يې له سوریې، ۵.۷ میلیونه له اوکراین او ۵.۷ میلیونه نور بیا له افغانستانه دي.»

د ملګرو ملتونو د کډوالۍ سترې کمشنرۍ دغه راپور داسې مهال خپروي، چې افغان کډوال په بهر کې له ګڼو ستونزو سره مخ دي.

په دې ستونزو او خطرونو کې د افغان کډوالو وهل ډبول، نیول کېدل او آن وژل هم شامل دي. په دې ترڅ کې تازه بریتانیا افغان کډوالو ته تر راتلونکي اګېست میاشتې پورې وخت ورکړی دی، ترڅو له هغو هوټلونو ووځي، چې دامهال په کې مېشت دي.