د کابل بانک مخکیني مشر خلیل الله فېروزي ۱۴ میلیونه ډالر حکومت ته ورکړي او ډیر ژر به ۱۸ میلیونه نور هم ورکړي.
ارګ وایي، د کابلبانک د تصفیې کمېټه بریالۍ شوې چې په تېرو ۱۶ میاشتو کې د ۱۲میلیون ډالرو په ارزښت د کابلبانک د پوروړو ملکیتونه مالیې وزارت ته انتقال کړي او د ۱۳ میلیون ډالرو په ارزښت د پورونو د لېږد بهیر تر کار لاندې دی چې په ټوله کې ۲۵ میلیونه ډالر ترلاسه شوي دي.
د ارګ په خبرپاڼه کې راغلي چې، د دغه بانک مخکیني مشر خلیل الله فېروزي په خپلو یو شمېر ژمنو عمل کړی او ۱۴ میلیون ډالره یې ورکړي او د ۱۸ میلیون ډالرو د ترلاسه کولو کار نهايي شوی چې ډیر ژر به حکومت ته وسپارل شي.
خبرپاڼه زیاتوي چې، له هیواده بهر د کابلبانک د پوروړو د ملکیتونو د ترلاسه کولو په موخه هم کار روان دی.
