د سیاسي چارو شنونکی توریالی ځاځی وايي:« ملګري ملتونه له امریکا پرته په نړۍ کې هېڅ هم نشي کولی. دا هم په خپله بشري جنایت دی چې د افغانانو او افغانستان په هکله یې ترسره کوي لکه اوس چې یې ویلي دي د طالبانو په منځ کې اختلاف موجود دي دا د دې لپاره دي چې دوی د بحران په سیمه کې وساتي او خپل اقتصادي او سیاسي اهدف ترلاسه کړي.»
د سیاسي چارو شنونکی هاتف مختار وايي:« د ملګرو ملتونو له لوري چې کوم راپور خپور شوی دی، د بې طرفۍ اصل یې تر پښو لاندې کړی دی. د دغه راپور طراحان او بنسټ ګر هغه خلک دي چې د اسلامي نظام او اسلامي فکر پر ضد په نړیواله کچه لابي کوي.»
د پوهنتون استاد فیض محمد ځلاند بیا وايي، د ملګرو ملتونو امنیت شورا دغه راپور له نړۍ سره د اسلامي امارت د تعامل لپاره یوه منفي تګلاره رامنځ ته کړې او د افغانستان حکومت رسمیت پيژندنې ته یې لار نوره هم اوږده کړې.
هغه زیاتوي:« دغه راپور له اسلامي امارت سره د نړۍ د تعامل لپاره یوه منفي تګلاره وضع کړې. له دې راپور له مخې داسې نه ښکاري چې د روان کال تر پایه دې د نړیوالې ټولنې له لوري له تورلیسته د اسلامي امارت مشرانو د نومونو اېستلو او یاهم د دولت د رسمیت پیژندنې په برخه کې دې ګوم کوټلی ګام پورته شي.»
اسلامي امارت وايي، د ملګرو ملتونو له لوري د دغه ډول منفي راپورونو نشر نه یوازې دا چې د افغانستان او نړۍ له سولې او امنیت سره مرسته نه شي کولی، بلکې د خلکو د اندیښنو زیاتوالي لامل کیږي او همدا راز د ملګرو ملتونو پر خپلواکۍ او بې پرېتوب شکونه لا زیاتوي.
