اسلام اباد ته د طالبانو او امریکایي پلاوي په ورتګ سره د پاکستان د بهرنیو چارو وزارت هیله ښودلې چې د دواړو لورو ترمنځ به ډېر ژر مذاکرات پیل شي.
د طالبانو پلاوي د پاکستان له لومړي وزیر او د پوځ له مشر سره هم لیدلي دي.
د پاکستان د بهرنیو چارو وزارت څخه په خپره شوې خبرپاڼه کې راغلي چې د امریکا سره د طالبانو د سولې خبرو د بیا پیل لپاره هیله لیدل کېږي.
د پاکستان د بهرنیو چارو وزارت خبرپاڼه کې داسې راغلي (( په سيمه ييزه او نړيواله کچه د افغان سولې په تړاو بې سارې اجماع رامنځته شوې او بايد دا مهلت له لاسه و نه وځي، دواړو لورو د سولې د خبرو د بيا پیل پر سر هوکړه کړې ده.))
له روسې،ایران او چین وروسته دا پاکستان ته د طالبانو پلان شوی سفر دی چې امریکا سره د ناکامه خبرو وروسته داسې مهال غوښتل شوي چې د امریکا یو پلاوی هم ورغلی دی.
د طالبانو سیاسي دفتر ویلي، پاکستان سره یې د افغان کډوالو په ستونزو او سیاسي اړیکو خبرې کړي دي خو په دې اړه مالومات نه شته.
په قطر کې د طالبانو ویاند سهیل شاهین داسې ویلي (( اسلام اباد ته تللی پلاوی به ددواړو هیوادونو په تعلقاتو، سیاسي موضوعاتو او سولې په جریان خبرې وکړ، همداشان پاکستان کې د افغان مهاجرینو د تعلیم، صحت، تګ راتګ او د ویزو په ورکړه کې د سهولتونو، د افغان تجارانو سره د همکارۍ غوښتنه وشوه چې په مقابل کې شاه محمود قریشي د مرستې ژمنه وکړه.)))
اسلام اباد ته د طالبانو له ورتګ یوه ورځ مخکې د امنیت شورا سلاکار حمدالله محب طالبان د ای اس ای استازي بللي دي او په زغرده یې ویلي چې افغانان به هېڅکله په زور چا ته تسلیم نه شي.
حمدالله محب داسې ویلي (( له پيړیو راهيسې موږ په جګړه کې يوو، موږ کولای شول، چې يوې ځانګړې مفکورې ته د شوروي اتحاد پر مهال تسليم شوي وای، چې له طالبانو خورا غوره وو هغه ځکه چې د ودونو تالارونه يې نه ورانول او زيربناوې يې رغولې او افغانان هېڅ چاته هم په زور نه دي تسليم شوي او طالبان د پاکستان او د آی اس آی استازي دي او دا له تصوره لرې ده، چې د يو داسې هېواد حکومت پر خپل ملک کې ومني، چې خپلو وګړو ته خواړه هم نشي برابرولی.))
تر اوسه پورې د سولې په برخه کې د پاکستان همکاري نه ده محسوس شوې خو په پاکستان باور هغه وخت کېدای شي چې افغانستان کې روان تاوتریخوالی کم شي.
