د ملګرو ملتونو د بشري مرستو د همغږۍ دفتر یا اوچا په یو تازه راپور کې لیکلي، د ۲۰۱۹ کال د جنورۍ له لومړۍ نېټې یې تر ۱۱ سپتمبر پورې په افغانستان کې پر بشري مرستندویانو ۳۱۹ پېښې ثبت کړې دي چې نیمايي یې په مستقیم یا غیر مستقیم ډول د بشرپاله مرستندویانو پر وړاندې د تاوتریخوالي دي یا د هغوی پر مال او امکاناتو بریدونه شوي دي.
اوچا وايي، په دغه موده کې ۲۸ بشرپاله مرستندویان وژل شوي، ۳۱ ټپیان دي او ۳۳ نور تښتول شوي دي.
راپور کې راغلي، کابل او کندهار هر ولایت کې ۳۱ پېښې شوې دي، دا د نورو ولایتونو په پرتله تر ټولو خونړي ولایتونه هم دي، ننګرهار کې بیا ۲۹ او بلخ کې ۲۰ پېښې شوې دي چې دا ولایتونه د خونړیتوب له پلوه په دویم او دریم مقام کې راځي.
اوچا همدارنګه خبرداری ورکړی چې که ناامني او تاوتریخوالی دوام وکړي په افغانستان کې به سږ کال ۶ اعشاریه ۳ میلیونه اړمن کسان لا زیات بد حالت سره لاس و ګرېوان شي.
