د رياست الوزرا سياسی مرستيال او کفيل مولوي عبدالکبیر پر جاموتونو او مذهبې ځايونو بريدونه له اسلامي احکامو او مقدساتو سره ښکاره دښمنې بللې او امنيتې ځواکونو ته یې سپارښتنه کړې، چې د پیښې عاملين پیدا او د قانون منګولو ته يې وسپاري.
عبدالکبیر زیاته کړې:« د افغانستان او اسلام تور زړو دښمنانو نن د بدخشان د فیض اباد په نبوي جومات کې، چې د مولوي نثار احمد احمدي د فاتحې مراسم په کې روان وو، چاودنه وکړه چې له امله یې زموږ یو شمېر هېوادوال شهیدان او ټپيان شول. پر جوماتونو او مذهبي مراسمو بریدونه د دښمن د کمزورۍ او له اسلامي احکامو او مقدساتو سره ښکاره دښمني ښيي چې په هېڅ صورت توجيه کېدای نه شي. زه دا برید په کلکو ټکو غندم او امنیتي ځواکونو ته هدایت ورکوم چې د پېښې عاملین پیدا او د شریعت منګولو ته وسپاري.»
د اسلامي امارات وياند ذبیح الله مجاهد هم دغه بريد ته غبرګون ښودلی او دا کړنه يې د اسلام د ښمنانو کار ياد کړی دی.
مجاهد زیاته کړې:« د بدخشان په فیض اباد ښار په مسجد کې چاودنه چې له امله یې ۱۱ تنه هېوادوال شهیدان او ۳۰ تنه ټپيان شول په کلکه غندو. داسې کړنې د اسلام د دښمنانو کار دی. د پيښې شهیدانو ته جنت الفردوس او ټپیانو ته شفاء غواړو او مصیبت ځپلو کورنیو ته د زړه له کومې تسلیت وړاندې کوو. د هېواد امنیتي ځواکونو ته دنده سپارل شوې چې لکه د تیرو جنایتونو په څېر د دغه جنایت عاملین هم پیدا او د خپل شوم عمل په سزا ورسوي.»
پخواني ولسمشر حامد کرزي اود مخکېني حکومت د ملي روغې جوړې سترې شورا مشر ډاکټر عبدالله عبدالله د فيض اباد بريد ته په غبرګون کې ليکلي، چې دا چاره يو تروريستې او د اسلامي موازينو خلاف عمل دی.
د افغانستان پخوانی ولسمشر حامد کرزی وايي:« د بدخشان مرکز فیض اباد ښار له نبوي مسجد سره نږدې د نن ورځې چاودنه، چې له امله یې گڼ شمېر هېوادول شهیدان او ټپیان شوي، په کلکو ټکو غندم. دغه پیښه یو تروریستي او د ټولو انساني او اسلامي موازینو خلاف عمل بولم.»
د مخکېني حکومت د ملي روغې جوړې سترې شورا مشر ډاکټر عبدالله عبدالله وايي:« په ډېرې خواشینۍ سره خبر شوم، چې د بدخشان په نبوي مسجد کې د چاودنې له امله یو شمېر هېوادوال شهیدان او ځينې نور ټپیان شول. په مساجدو او مذهبي مقدساتو بریدونه د اسلام له احکامو او انساني اصولو سره په ټکر کې عمل دی، چې هېڅ ډول توجیه نه لري.»
