له ۳۰۰ ولسوالیو څخه د ټاکنو حساس مواد مرکز ته انتقال شوی دي.
ټاکنو کمېسیون وایي، له بایو مټریک پرته هیڅ ډول رایه د اعتبار او حساب وړ نه ده.
د کمېسیون مسولینو همدا راز د نوماندانو له خولې د لوړو رایو اخیستو ادعا بې بنسټه ګڼي وايي، وروستي او کره ارقام د کمېسیون له رسمي ادرسه خپریږي.
د مالوماتو په اساس نن ورځ له څه باندې درې سوه ولسوالیو څخه حساس مواد مرکزونو ته رسېدلي دي.
ټاکنو کمېسیون د امنیتي مسولینو په همکارۍ لګیا دي چې له لېرې پرتو ولسوالیو حساس مواد ولایتي دفترو ته راغونډ کړي چې د وروستیو مالوماتو له مخې د څه باندې دری سوه ولسوالیو مواد یې ولایتي دفترونو ته راټول کړي دي.
د ټاکنو مسولین وايي، له بایو مټریک پرته هیڅ ډول رایه د باور وړ نه ده.
د ټاکنو کمېسیون کمېشنر مولانا عبدالله داسې وویل (( له بایومتریک پرته به هم رای کارېدلي وي خو پرته له بایومتریک کاریدلې رای د منلو او حساب وړ نه دي.))
رسمي ادرسونه وايي، له ځینو ولسوالیو سره د اړیکې پرې کېدو له امله نشي ویلی چې څومره کسانو په ټاکنو کې ګډون کړی، خو اټکل دا دی چې نږدې دوه نیم میلیونه وګړو په ټاکنو کې ګډون کړی.
د ځینو نوماندانو له خوا په ټاکنو کې د زیاتو رایو اخیستو او بریا اعلان په اوس کې د اندېښنې په توګه مطرح دي.
مسولین وايي، په ټولنیزو رسنیو کې او د نوماندانو له خولې دا وړ خبرې حقیقي او کره نه دي او د اعلان وروستۍ مرجع ټاکنو کمېسیون دی.
د ټاکنو کمېسیون کمېشنر مولانا عبدالله وویل (( خلک او نوماندان دې، د کمسیون له پرېکړې وړاندې څرګندونې او پرېکړې نه کوي، د ټاکنو د پایلو وروستۍ مرجع ټاکنو کمیسیون دی.))
ټاکنو کمېسیون د دوشنبې په ورځ د رایو راټولولو لپاره په مرکزي دفتر کې ډېټا سنټر هم پرانېست او له دې وروسته به له ولایتونو را ټول شوي مواد په دې مرکز کې ثبت شي.
