پاکستان د امریکا او طالبانو ترمنځ د سولې خبرو ځنډېدو په تړاو ویلي، دوی افغانستان کې سوله ییز حل غواړي.
پاکستان ویلي، تل پر خپله هغه تګلاره ولاړ دي چې افغانستان کې شخړه د جګړې له لارې نه شي حل کېدای.
د پاکستان د بهرنیو چارو وزارت په خبرپاڼه کې راغلي چې، پاکستان د امریکا او طالبانو ترمنځ د سولې خبرو اترو بیا پیل ته خوشبین دی.
اعلامیه کې راغلي چې پاکستان د سولې بهیر کې په ښه نیت او ګډ مسؤلیت زمینه برابروي او ښکیلې غاړې یې هڅولي چې په حوصله کار وکړي.
طالبانو د سولې هوکړې ته د رسیدلو خبرو د ځنډ پړه پر امریکا اچولې او په خبره یې، چې زیات زیان به هم امریکا وګوري.
په قطر کې د طالبانو د سیاسي دفتر ویاند سهیل شاهین ویلي، څو ورځې وړاندې یې د امریکایي ټيم سره هوکړه لیک وروستی شو او متن یې د دواړو ټيمو د مشرانو لخوا په نښه او د قطر
چارواکو ته وسپارل شو.
شاهین پر خپل تویتر لیکلي، ټول پرې راضي وو او پر دې هم هوکړه وشوه چې د سولې هوکړې متن به د قطر هیواد اعلان کړي، چې په وینا یې ناببره د امریکا ولسمشر ټرمپ ټویټونه د
حیرانتیا وړ او په خبره یې چې ټرمپ خپل باور زیانمن کړ.
له دې سره امریکا تر هغې له طالبانو سره د سولې خبرې بیرته نه پیلوي، تر څو طالبان په خپل چلند کې بدلون رانه ولي.
د امریکا د بهرنیو چارو وزیر مایک پامپیو ویلي، هوکړه خو پر کاغذ وي، خو مهمه دا ده چې طالبان خپل چلند بدل کړي.
مایک پامپیو د امریکا اې بي سي ټلویزیون ته ویلي، له طالبانو سره د خبرو لپاره د امریکا ځانګړی استازی زلمی خلیلزاد هم بېرته امریکا ته ستنېږي.
پامپیو تمه ښودلې چې طالبان به خپل چلند بدل کړي او هغو مسلو ته چې په اړه یې د میاشتو لپاره خبرې شوي بیا ځان ژمن کړي.
هغه ویلي، هیله لري چې له طالبانو سره د خبرو اترو له لارې مسله هواره کړي او په وینا یې طالبان حاضر شي چې له افغان حکومت او تر هغې وروسته له ولسمشر غني سره وګوري.
