د امریکا ولسمشر ډانلډ ټرمپ پر خپل تویټر لیکلي، په پام کې وه چې یکشنبه په ډېوېډ کمپ کې له افغان ولسمشر او طالب مشرانو سره وګوري خو دا کتنه یې لغوه کړه.
ډانلډ ټرمپ ويلي، په ډېوېډ کمپ کې یې د سولې په تړاو د طالبانو له مشرانو او له افغان ولسمشر محمد اشرف غني سره خبرې لغوه کړې او د امریکا او طالبانو ترمنځ د سولې په تړاو خبرې یې هم درولې دي.
ویل کېږي، له طالبانو سره د ترمپ خبرې ځکه لغوه شوې چې طالبانو په کابل کې د هغه برید مسؤولیت منلی چې د یوه امریکايي سرتېري په ګډون یې ۱۲ کسان ووژل.
په ورته وخت کې له طالبانو سره د خبرو لپاره د امریکا ځانګړي استازي زلمي خلیلزاد د تېرې دوشنبې په ورځ اعلان وکړ چې له طالبانو سره په اصولو کې هوکړه نهايي شوې او یوازې د ډونلډ ټرمپ تایید ته اړتیا ده.
له دې سره ولسمشرۍ ماڼۍ وایي، د سولې په روانه پروسه کې د رامنځته شوي خنډ لامل د طالبانو روانه جګړه او تاوتریخوالی دی.
ولسمشرۍ ماڼۍ وايي هغه مهال تل پاتې سوله ټینګېدای شي چې طالبان له جګړې لاس واخلي اوربند اعلان کړي او افغان دولت سره مخامخ خبرو ته حاضر شي .
ارګ په خپره کړې خبرپاڼه کې لیکلي د سولې پر وړاندې ستر خنډ د طالبانو جګړه او تاوتریخوالی دی .
اعلامیه کې راغلي چې افغان دولت د سولې په تړاو د سولې مشورتي لویې جرګې پریکړو ته درناوی لري او ددې جرګې له لوري وړاندې شوې کړنلارې تعقیب خپل مسولیت ګڼي.
ارګ په ورته وخت کې د امریکا له لوري سولې برخه کې شوې هڅې ستایلي او له دوی سره یې په ګډ کار ټینګار کړی.
ارګ دغه اعلامیه وروسته له هغې خپره وي چې د امریکا ولسمشر ډونالډ ټرمپ له طالبانو سره د لیدو کتو څخه انکار وکړ او د سولې خبرو د دریدو امر یې وکړ.
