دوی په دې باور دي،چې نړۍ د افغانستان حکومت مهم او باصلاحیته کسان په تورو لیستونو کې شامل کړي، چې دغه کار تر ډېره د افغانستان پر بهرنیو اړیکو اغیز کړې ده.
د دوی په خبره، د ملګرو ملتونو د امنیت شورا له تورلیسته د اسلامي امارت چارواکو د نومونو اېستل به له سیمې او نړۍ سره د افغانستان اړیکې نورې هم نږدې کړي او د دې کار لپاره مهمه ده، چې افغان دولت د خپلو ولسونو مشروع غوښتنې له پامه ونه غورځوي.
د سیاسي چارو تحلیل کوونکی قریب الرحمان شهاب وايي:« له تورو نوملړونو د افغان مسوولینو د نومونو اېستل یو مهم بحث دی، چې دا د افغانستان په سیمه ییزو او نړیوالو اړیکو باندې مستقیم اغیز لري. د دې لپاره باید په کور دننه د افغانانو په غوښتنو چې د نړیوالو له لوري هم بدرګه کیږي، باید پام ورته وشي.»
ځینې په دې باور دي، چې د افغانستان اوسنیو ستونزو حل د دوحې تړون په بشپړ ډول عملي کیدو کې پروت دی او همدا زار له تورو لیستونو د افغان مشرانو نومونو اېستل او د نړیوالو بندیزونو د کمولو لپاره باید سرپرست حکومت پر دایمي بدل شي او همدراز اساسي قانون دې رامنځ ته شي.
د پوهنتون استاد فیض محمد ځلاند وايي:« د طالبانو او امریکا ترمنځ د دوحې تړون ټولو هغو ستونزو ته چې په افغانستان کې یې لرو، د حل لارې وړاندې کوي، له رسمیت پيژندنې سره ، دتورلیست پاکولو او همدراز د بندیزونو لرې کولو سره، د دوحې تړون په عملي کیدو سره حل کیدای شي او همدا راز له سرپرست حکومت دایمي حکومت رامنځ ته شي او د خپل ملت په استازیتوب اساسي قانون جوړ شي.»
دملګرو ملتونو د تورلیست په تړاو ځينې نظرونه بیا داسې دي، چې نړیوالو دغه کار د خپلو موخو لپاره کړی او که اهداف یې ترلاسه شي د افغانانو نومونه به ترې پاک کړي.
د خلاصون لارې شورا مشر سید اکبر اغا په دې اند دی،هغه اهداف چې نړۍ یې د تورلیستونو ترشا لري، ښايي د افغانستان پر زیان وي او حکومت هم ښايي همدا مسله په پام کې نیولي وي.
اکبر اغا زیاته کړې:« د تورلیست پاکولو موضوع ملت پورې اړه نه لري،چې په کور دننه دوی باید څه وکړ. په دې برخه کې بهرنیان خپل مطالب او مقاصد لري او هغه غواړي،چې مقاصد یې ترسره شي او بیا د تور لیست خلک وباسي او که طالبان هغه مقاصد له دوی سره ومني، دا د افغانستان په زیان باندې به وي.»
دملا عبدالغني برادر ، سراج الدین حقاني ، ملاحسن اخوند ترڅنګ د اسلامي امارت ګڼو مشرانو نومونه د ملګرو ملتونو په تورلیست کې شامل دي،چې دغه کسان بهرني سفرونه شي کولی او همدراز د نړۍ له نورو بندیزونو سره هم مخ دي.
