د سرحدونو او قبایلو وزارت وايي٬ اغزن سیم نشي کولای افغانان سره بیل کړي.
د سرحدونو وزارت له نړیوالې ټولنې وغوښتل چې د بلوڅ او پښتون قوم حقوق دې په پاکستان کې ورکول شي.
بلوڅان وايي٬ د افغانانو او بلوڅانو ستونزه یوه ده او اړتیا ده چې افغان حکومت ورته جدي پاملرونه وکړي.
د سنبلې نهمه د پښتنو او بلوڅو د پیوستون ورځ د سرحدونو او قبایلو وزارت له لورې ونمانځل شوه.
د سرحدونو او قبایلو وزارت وايي٬ په پښتنو او بلوڅو جګړه د پردیو استخباراتو له لورې تپل شوې٬ او اغزن سیم په واسطه افغانان نشي بیلیدلی.
د بلوڅانو شورا مشر نادر بلوڅ په حکومت نیوکه وکړه٬ چې د بلوڅانو غږ نه اوري٬ او حتا په حکومت کې یې هم ونډه نه ده ورکړې.
ددې شورا مشر محمد نادربلوچ وايي٬ دافغانانو او بلوڅانو ستونزه یوه ده٬ که دې ستونزې ته رسیدګي ونشي نور به هم له ګواښونو سره مخ شي.
نادربلوڅ داسې وویل (( که حکومت د سنبلې نهمه چې د بلوڅانو او پښتنو د یووالي ورځ ده لازمه توجه ونه کړي، هیڅ وخت به افغانان د خوښۍ او نیکمرغه ورځ ونه لري.))
په ورته مهاله له کوزې پښتونخوا څخه راغليو مشرانو له نړیوالې ټولنې وغوښتل چې د بلوڅ او پښتون قوم حقونو ته دې پاملرنه وکړي.
دوی له ولسمشر غني وغوښتل چې د دې موضوع په تړاو دې جدي اقداماتو لارښوونه وکړي.
د سنبلې نهمه د پښتنو او بلوڅو د پیوستون ورځ شاوخوا اویا کلونو راهیسې نمانځل کیږي٬ خو بلوڅان نیوکه کوي چې د سرحدونو وزارت ددې ورځې په برخه کې ډير عادي چلند کوي.
