د کندز امنیه قومندان ډاډ ورکوي، چې ښار ته تازه دمي ځواکونه رسیدلي او ډیر ژر به طالبان په شا وتمبوي.
طالبانو د کندز ښار پر یو شمیر مهمو سیمو ډله ییز بریدونه کړي.
دا بریدونه تیره شپه د کندز ښار په څلورو دروازو او کمربندي پوستو پیل او تر اوسه جګړه دوام لري.
د کندز امنیه قوماندان منظور ستانکزي سهار مهال رسنیو ته وویل، چې وضعیت د دوی په کنټرول کې دی او طالبان یې شاتګ ته اړویستي دي.
خو تر اوسه په دغه جګړه کې کوم پرمختګ نه دی شوی، له بلې خوا طالب ویاند ذبیح الله مجاهد ویلي، د خان آباد بندر، امام صاحب بندر، زاخیلو، کابل بندر، زرخرید او سه درک سیمو ته رسیدلي او ګڼ شمېر پوستې یې نیولي چې په وینا یې لس پولیس یې هم وژلي دي.
امنیه قومندان د کندز اوسیدونکو ته ډاډ ورکوي، چې د دفاعي او امنیتي ځواکونو ترمنځ بشپړه همغږي شته او دوی به دوینې تر اخري څاڅکې له کندز او کندوزیانو ساتنه وکړي.
په دغې جګړه کې لسګونو ولسي وګړو ته هم مرګ ژوبله اوښتې خو طالبانو او افغان ځواکونو ته د مرګ ژوبلې دقیق ارقام نه شته.
طالبانو د کندز حوزوي روغتون ته څیرمه د سې درک سیمه کې د کابل کندز عمومي لار هم تړلې ده.
