امریکا د خپلو ځواکونو ایستلو لپاره کوم مهالویش نه لري.
امریکا ویلي، افغانستان کې د سولې په تړاو هېڅ ډول بیړه نه کوي او ګوري به چې څه کېږي.
د امریکا ولسمشر ډانلډ ټرمپ تیره ورځ د جي ۷ هېوادونو سرمشریزې په څنډه کې خبریالانو ته ویلي، افغان سولې او له دې هېواده د خپلو ځواکونو ایستلو لپاره کوم مهالوېش نه لري.
ډانلډ ټرمپ ویلي، د امریکا حکومت دا مهال له طالبانو، افغان حکومت او نورو ښکېلو غاړو سره په خبرو بوخت دی او ګوري به چې څه کېږي.
ټرمپ ویلي، افغانستان کې د دوی رول د سوله ساتي ځواک یا د پولیسو دی، او له دې پرته امریکایان هلته نور څه کار نه لري.
ټرمپ په داسې حال کې دغه څرګندونې کوي، چې همدا اوس په دوحه کې د امریکا او طالبانو ترمنځ د سولې نهم پړاو خبرې روانې دي او تمه شته چې د سولې هوکړه لیک په .همدې پړاو کې وروستی شي
