خلیلزاد ویلي، د حکومت د جوړښت پرېکړه افغانان کولی شي.
امریکا وايي د راتلونکي حکومت د جوړښت په اړه یوازې افغانان پرېکړه کولی شي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي له طالبانو سره یې تر دې دمه د حکومت د جوړښت په تېره بیا د موقت حکومت د جوړېدو په تړاو هېڅ راز بحثونه نه دي کړي.
نوموړي ویلي د حکومت جوړښت د افغانانو حق دی او په دې مسئله به په بین الافغاني خبرو کې بحثونه کېږي.
تېره ورځ الجزیرې عربي څانګې په یوه خبر کې ویلي وو، چې طالبانو او امریکا د څوارلس میاشتني موقت حکومت پر جوړېدو هوکړه کړې ده.
خو وروسته طالبانو او بیا امریکا دغه راپور رد کړ.
طالب ویاند سهیل شاهین هم په یوه ټوېټ کې ویلي، چې دوی له امریکا سره د راتلونکي حکومت پر جوړښت تر دې دمه هېڅ بحث نه دی کړی.
