پاکستاني ځواکونو یو ځل بیا د کونړ پر دانګام ولسوالۍ پنځوس راکټونه توغولی دي.
د دانګام ولسي وګړو شمشاد ته ویلي، دا راکټي بریدونه تیره شپه د دانګام ولسوالۍ په نوي برول، سنو سیمو لګیدلي دي.
بریدونو کې چاته د سرزیان نه دی اوښتی خو مالي زیانونه یې اړولي دي.
افغان حکومت دغه بریدونه غندلي دي.
د ولسمشرۍ ماڼۍ ویاند، صدیق صدیقيوايي، (( افغان حکومت د افغانستان په خاوره د پاکستان وروستي راکټي بریدونه په کلکه غندي. زمونږ په اند د پاکستان دغه کړنه د نړیوالو اصولو ښکاره سرغړونه ده او ددې ښکارندویي کوي چې پاکستان په افغانستان او سیمه کې سولې او ثبات ته ژمن نه دی.((
