امریکا له طالبانو سره د نهم پړاو خبرو ته چمتووالی نیسي.
افغان حکومت د امریکا او طالبانو له هوکړې تمه لري چې اوربند به هم اعلان کړي چې بین الافغاني خبرې پيل شي.
امریکا بیا له طالبانو سره د نهم پړاو خبرو ته چمتووالی نیسي، هغه دوه موارد چې اته پړاوو کې پرې بحث شوی، ممکن نهم پړاو کې لاسلیک ته چمتو شي، خو ارګ له دې هوکړې تمه لري، چې اوربند به وشي او بین الافغاني خبرې به پيل شي.
دا هوکړه د امریکا او طالبانو ترمنځ ده چې افغاني اړخ پکې شامل نه ښکاري، تمه ده چې له دې هوکړې وروسته د خلیلزاد هغه خبرې چې په څلورو موضوعاتو به هوکړه کیږي، عملي شي او افغانان خپل منځ کې هم یو حل ته ورسیږي.
سیاسي شنونکی ولی الله شاهین داسې وايي (( تېرو خبرو ته په کتو ښايي نهم پړاو خبرې اوربند او بین الافغاني خبرو ته لار پرانیزي.))
نیوکه دا ده چې طالبانو له امریکا سره هوکړه کوي، خو د جګړې قرباني مخکې هم افغانان و او تر دې وروسته به هم له افغان ځواکونو او افغانانو سره په جګړه وي.
په امریکا هم نیوکه ده چې له افغانانو سره یې ستراتيژيکه ملګرتیا و نه کړه.
عزیز الله ستانکزي داسې وویل (( د نږدې دوه لسیزې جګړې قربانیان افغانان وو، او اوس هم دي، د امریکا طالبانو ترمنځ له هوکړې وروسته باید اوربند اعلان شي داسې نه شي چې له طالب وروسته داعش سره جګړه پيل کړي، چې بیا به هم قرباني افغانان ورکوي.))
له دې سره یو ځای ډاډ نشته چې امریکا او طالبان به نهم پړاو خبرو کې هم هوکړه لاسلیک کړي، ګارډن ورځپاڼې د ځینو سرچینو له قوله لیکلي چې له امریکا سره خبرو کې ځینو طالب مشرانو سره مشوره نه ده شوې او مخالفت یې ښودلی، خو طالبانو بیا دا راپورونه رد کړي دي.
