ولسمشر غني وايي، طالبان نه شي کولی د بریدونو په غندلو سره ځانته برات ورکړي.
طالبانو نړیوالو ترهګرو ته د فعالیت زمینه برابره کړې ده.
د ارګ له لوري په خپرې شوې خبرپاڼه کې ولسمشر غني د واده پر مراسمو د برید د غندلو تر څنګ ویلي، طالبان نه شي کولی چې د برید په غندلو سره ځان ته برأت ورکړي.
ولسمشر غني ویلي، ترهګرو ته د فعالیت چاپېریال طالبانو برابر کړی او خبرداری یې ورکړی چې افغان ځواکونه به د بې ګناه افغانانو د وینې غچ واخلي.
ولسمشر غني پر نړیوالې ټولنې هم غږ کړی چې د بشر ضد کړنو په اړه چوپ پاتې نه شي او د افغانانو تر څنګ ودرېږي.
ولسمشر غني اړوندو مسوولینو ته لارښوونه کړې چې د وروستۍ پېښې په تړاو په هر اړخیزه توګه څېړنې وکړي.
تېره شپه د کابل ښار په یو هوټل کې د واده په مراسمو کې د چاودنې له امله نږدې ۲۵۰ تنو ته مرګ ژوبله واوښته چې تر نیمايي یې ښځې او ماشومان و.
ددغه برید مسوولیت داعش وسله والې ډلې په غاړه و اخیست.
