د افغانستان له خاورې نورو هېوادونو ته د امنیتي ګواښونو په اړه د نړۍ او اسلامي امارت څرګندونې، ادعاوې او د ادعاوو رد لا هم پر خپل ځای دي.
د امریکا پوځ مرکزي قوماندانۍ مشر څه موده وړاندې اندېښنه ښودلې وه،چې ښایي راتلونکو شپږو میاشتو کې د افغانستان له خاورې پر امریکا یا د امریکا پر متحدو هېوادونو بریدونه وشي.
یاده اندېښنه د پنجشنبې پر ورځ یو ځل بیا د امریکا سنا جرګې غړو او لوی درستیز له خوا تازه شوې ده.
د امریکا لوی درستیزانو مشر جنرال مارک میلي ویلي، پر افغانستان له لرې څار لري او که اړتیا شوه،د ګواښونو له منځه وړلو لپاره به اړین اقدام وکړي.
میلي زیاته کړې:« ۱۸ میاشتې مخکې هم ما ویلي ول،چې ښایي راتلونکو ۱۸ میاشتو کې له افغانستانه امریکا ته امنیتي ګواښ پېښ شي. که څه هم یو څه ستونزمنه شوې،خو موږ لا هم له لرې د افغانستان وضعیت څارو او که اړتیا شوه، د ګواښونو له منځه وړلو لپاره به عملي اقدام هم وکړو.»
دا اندېښنه داسې مهال تازه کیږي،چې د اسلامي امارت بهرنیو چارو سرپرست وزیر مولوي امیر خان متقي تېره اووتۍ اسلام آباد کې هېوادونه چلنج کړل،چې افغانستان کې دې ان د یوې ترهګرې ډلې شتون ثابت کړي.
له امنیتي ګواښونو ور اخوا امریکا له دې هم ویره لري،چې ښایي افغانستان کې د دوی لخوا پرېښودل شوي پوځي تجهیزات د دوی پر ضد وکارول شي.
یادې موضوع امریکا کې په کور دننه هم ناندرۍ راپورته کړي او د پخواني ولسمشر ډونالډ ټرمپ او اوسني ولسمشر جو بایډن ترمنځ تر ټولو ستر اختلافي او ناندریز ټکی دی.
