د حافظ احمدالله وژنه کې د سیمې استخباراتو تورن ګڼل کېږي چې نه غواړي افغانستان کې سوله راشي.
د امریکا او طالبانو ترمنځ د سولې مذاکرات وروستي شوي خو د سیمې استخباراتو هڅې پیل کړي چې دغه مذاکرات سبوتاژ کړي .
دلته کابل کې بیا باور دادی چې په پاکستان کې دملا هیبت الله اخندزاده پر ورور حافظ احمدالله برید دسیمې دهغو استخباراتو کار دی چې نه غواړي په افغانستان کې سوله ټینګه شي .
خو طالبان بیا په دې اړه خپله بې خبري ښي .
شنونکي عبدالودود صدیقي شمشاد ته داسې وویل (( د سیمې استخبارات د خپلو اهدافو لپاره دغه شان بریدونه کوي، اوس چې د سولې خبرو کې پرمختګ شوی دی او ممکن نږدې وخت کې افغانستان ته سوله راشي د سیمې استخبارات هڅه کوي دغه خبرې ناکامه کړي تر څو افغانان بیا هم په جګړه کې پاتې شي.))
ځينې بیا په دې نظر دي چې په کویټې کې مذهبي اختلافات هم شته او شاید دغه برید هم ددغو اختلافاتو له امله شوی وي .
د خلاصون لارې شورا مشر سید اکبر اغا شمشاد ته داسې وویل (( په کوېټه کې د شعیه مذهبو او سنیانو ترمنځ مذهبي اختلافات، د افغانستان روان وضعیت او طالبانو سره د سولې خبرې دا ټول ددې برید عوامل وي.))
طالب ویاند ذبیح الله مجاهد بیا په دې اړه خپله بې خبري ښي او وايي لا تراوسه په دې تړاو مالومات نه لري .
خو د ملي امنیت شورا ویاند کبیر حقمل داسې وویل (( د افغانستان تاکید همیشه پر دې و، چې ترهګري موږ سیمې او نړۍ ته ګواښ پېښوي او د هېچا په ګټه نه ده، له همدې امله باید په ګده د ترورریزم پر وړاندې ودرېږو او مبارزه وکړ، موږ هر ډول ترهګریز عمل غندو هغه که په افغانستان کې وي او که له افغانستانه بهر.))
د مولوي هیبت الله ورور حافظ احمد الله تیره ورځ د پاکستان د کویټې ښار په قشلاق سیمه کې د جمعې لمانځه پرمهال په یوه چاودنه کې ووژل شو، خو طالبانو ته ځینو نږدې سرچینو ویلي چې د طالبانو ترمنځ هیڅ ډول اختلاف نشته او دا برید هم د طالبانو کار نه دی .
