پاکستان کې د مخکېني لومړي وزیر عمران خان له نیولو کېدو وروسته، افغانستان لپاره د امریکا مخکېني ځانګړي استازي زلمي خلیلزاد ویلي، امکان شته دی، چې عمران خان په زندان کې ترور شي.
خلیلزاد ویلي، د عمران خان نیول هم خورا بد چلن شوی او زیاته کړې یې ده،چې اوس هم په زندان کې ورسره ناوړه چلن روان دی.
هغه زیاته کړې:« داسې مخ پر زیاتیدو وېره موجوده ده،چې ښایي عمران خان په توقیف کې ترور شي. عمران خان خپله دا اندېښنه د محکمې له مسوولینو سره شریکه کړې ده.» د پاکستان مخکېني لومړی وزیر عمران خان به د راتلونکو اوو ورځو لپاره په زندان کې وي.
بلخوا د اسلام آباد پولیس وایي،چې د عمران خان له نیول کېد وروسته یې د هغه تحریک انصاف ګوند اووه مشر غړي هم نیولي دي،چې په ډله کې یې د پاکستان پخوانی بهرنیو چارو وزیر شاه محمود قریشي هم شامل دی.
پولیسو ویلي،چې یاده نیونه یې قانوني ده او خبرداری یې ورکړی،چې نور کسان به هم ونیسي.
د پاکستان پوځ وایي،هېواد کې د روانو ناندریو او ګډوډیو تر شا د عمران خان ګوندي ملګرو لاس دی،خو تحریک انصاف ګوند په یوه اعلامیه کې بیا دا تورونه رد کړي دي.
د خبرپاڼې یوه برخه:« موږ په دې بارو لرو،چې خپلې موخې به په سوله ییزه، له تاوتریخوالي پرته او اساسي قانون په رڼا کې ترلاسه کوو. تحریک انصاف ګوند تل له اساسي قانون د انحراف مخالفت کړی دی. د عمران له نیول کېدو وروسته روان وضعیت ګڼ عوامل لري.»
له دې وراخوا د پاکستان اوسني بهرنیو چارو وزیر او د پاکستان خلکو ګوند مشر بلاول بوټو زرداري ویلي،چې د مې نهمه چې عمران خان په کې ونیول شو،د خپل هېواد په تاریخ کې یې توره ورځ بللې ده.
