له هغې وروسته چې د پاکستان مخکینی لومړی وزیر عمران خان د پولیسوله لوري ونیول شو، په دغه هېواد کې د نومړي ګوند غړو او پلویانو په پراخو لاریونونو لاس پورې کړ او دغه لاریونونه په تاوتریخوالې واوښتل،چې قهرجنو لاریونوالو د پوځ مشرانو پر کورونو او همداراز د پولیسو پر مرکزونو هجوم وروړ او ودانۍ یې تخریب کړې.
پاکستاني خبریالان وايي، په دغه هېواد کې سیاسي وضیعت ښه نه دی او حالات کړکیچن دي، خو د پاکستان دغه ناسم سیاسي وضعیت پرافغانستان هغه ډول اغیز نه شي کولی،چې څه ډول یې فکر کیږي.
پاکستانی خبریال طاهر خان وايي:« د پاکستان وضعیت بلکل ښه نه دی او د عمران خان له نیولو وروسته د پاکستان په ډېری سیمو کې د پي.ټي.آي پلویانو لاریونونه کړي دي،چې تشدت هم شوی دی او حالت ښه نه دی،ځکه مخکې نه پاکستان کې سیاسي بحران موجود وه او دې سره نور هم زیاتېدای شي. دا فطري خبره ده، چې پاکستان کې مشکلات پر افغانستان اثرات لري،خو زیات به نه وي.»
د سیاسي چارو کارپوهان وايي، پاکستان په خپل تاریخ کې دا لومړی ځل دی،چې له یو خطرناک کورني سیاسي بحران سره مخ دی او فکر نه کیږي،چې ژر به پایته ورسیږي.
دوی وايي، دا لومړی ځل دی، چې د پاکستان ولسونه د یوه سیاسي ګوند په چوکاټ کې د پوځ پر وړاندې راپورته شوي دي او غواړي،چې له استبداد یې ځان وژغوري.
د سیاسي چارو کارپوه توریالی ځاځی وايي:« پاکستان اوس له ډېر بد بحران سره مخامخ شوی دی او دا بحران به ژر پایته ونه رسیږي. دا لومړی ځل دی،چې په پاکستان کې ولس له یوه ګوند سره یوځای شوی دی او دوی نور غواړي، چې د نظامیانو او ای.ایس.ای له استبداد څخه ځان وژغوري.»
ځیني نور بیا وايي، د پوځ په حکم د عمران خان نیولو پاکستان له جدي ګواښ سره مخ کړی او په دغه هېواد کې نړیوال تضادونه هم روان دي، چې ممکن د اوسني کړکیچ مهار د پوځ له توان هم ووځي.
د سیاسي چارو کارپوه حکمت الله حکمت وايي:« هغه پاکستان چې په پورونو کې غرق دی، ناامني یې تهدیدوي ، ګاونډیان ترې وېره لري او نړیوال تضادونه په کې جریان لري، په ځانګړي ډول د امریکا او چین کیدای شي، پا کستان د دغسې یوه کړکیچ په نتیجه له منځه لاړشي، په سیاسي پیښو کې دا پاکستان د پوځ دخالت یا د عمران خان نیول د پوځ په حکم باندې په حقیقت کې د پاکستان لپاره تر ټولو جدي تهدید دی او کیدای شي مهار یې پوځ ته هم ستونزمن تمام شي.»
په ورته مهال د افغانستان سوداګر وايي، داسمه ده،چې د افغانستان ۵۰ سلنه ترانزیت اوسوداګرۍ له پاکستان لري،خو اوسنی بحران یې د افغانستان سوداګرۍ نه شي اغیزمنولی.
د سوداګرۍ خونه وايي،د پاکستان اوسنی سیاسي کرکیچ او بحران یوازې په لنډ مهاله توګه به د افغانستان پرترانزیت اغیز ولري.
اخوا بیا امریکا هم د پاکستان اوسنی وضعیت د اندیښنې وړ بللی دی او پایلې یې د اسلام اباد لپاره خطرناکې بللي دي .
