په افغانستان کې جنګېدونکې وسله والې ډلې د نړۍ لپاره په یو ګواښ بدلېدای شي.
د ولسمشر غني دا څرګندونې چې ګنې د افغان امنیتي او دفاعي ځواکونو مبارزو واشنګټن ارامه کړی د پوځي شنونکو له لوري ستایل شوي.
د پوځ پخواني چارواکي دولت وزیري او جنرال عتیق الله امرخېل وايي، له طالبانو بغیر دلته له شلو زیاتې مخالفې وسله والې ډلې فعالیت کوي چې د افغان حکومت لپاره یو ګواښ دی او که افغان ځواکونه یې پر وړاندې مبارزه ونه کړي نړۍ ته هم ګواښ کېدای شي.
د ارګ ویاند صدیق صدیقي وايي، دا یواځې طالبان نه دي چې د افغان حکومت پر ضد جګړه کوي.
صدیق صدیقي داسې ویلي (( افغانستان د نړۍ د امنیت لپاره مهم دی، دلته یواځې طالبان جګړه نه کوي، شل نورې وسله والې ډلې ترهګریز فعالیتونه لري، دوی نه یواځې د افغانستان لپاره یو ګواښ دی بلکې د نړۍ لپاره هم پر یو ګواښ بدلیدای شي.))
د سې شنبې په ورځ ولسمشر محمد اشرف غني د افغان امینتي او دفاعي ځواکونو یوې غونډې ته دوینا په مهال وویل، د هېواد امنیتي او دفاعي ځواکونو د تمویل او تجهیز لپاره به ښکاره نړیوال تعهد وجود ولري ، ځکه چې دا د مشترګو ګټو خبره او نړۍ به له افغانستان سره د شریکو ګټو پر بنسټ مخ ته ځي.
