کارپوهان: له ترهګرۍ سره د مبارزې لپاره دې سیمه ییزه اجماع رامنځ ته شي

په دې وروستیو کې روسیې ، پاکستان ، ایران او ګڼ شمیر نورو سیمه ییزو هېوادونو اندیښنې ښودلي، چې ګنې له افغانستانه ورته ګواښ متوجه دی .

پاکستان ټي ټي پي یادوي ، روسیه او ایران بیا د داعش ترڅنګ د ګڼو نورو ترهګرو ډلو نومونه اخلي، چې د دوی امنیت ته ترې ګواښ دی، خو اسلامي امارت بیا ټولو هېوادونو ته ډاډ ورکړی،چې چاته به اجازه ورنه کړي،چې د افغانستان له خاورې ورته ګواښ پیښ کړي.

 د سیاسي چارو کارپوهان بیا وايي، د سیمې او نړۍ هېوادونه دې د اندیښنو پر ځای له افغانستان سره د ګډې همکارۍ لپاره له ترهګرۍ سره د مبارزې په موخه سیمه ییزه اجماع رامنځ ته کړي.

دوی وايي، په نړۍ او سیمه کې د ترهګرۍ ادرسونه مالوم دي او پر وړاندې دې عملي اقدام وکړي.

 د سیاسي چار کارپوه  سرور نیازی وايي:« که واقعا هدف دا وي،چې له تروریزم سره مبارزه وشي، دا یوې ګډې مبارزې ته ضرورت لري،چې ټول هېوادونه په صادقانه ډول په دغه لار کې مبارزه وکړي، خو ځينې هېوادونه خپله د تروریزم روزنکي او تمویلوونکي دي. د افغانستان په شمول نورو هېوادونو ته یې لیږي،خو بیا همدا هېوادونه له تروریزم سره د مبارزې دعوا کوي،نو له تروریزم سره د مبارزې لپاره دې یوه سیمه ییز اجماع رامنځ ته شي،ځکه هېڅ هېواد په یوازې ځان نه شي کولی،چې له تروریزم سره مبارزه وکړي.»

ځینې نور بیا په دې باور دي،چې د تاریخ په  اوږدو کې افغانان ترهګر نه بلکې  د ترهګرۍ قرباني شوي او اوس هم افغانستان قرباني ورکوي.

دوی وايي، هغه هېوادونه چې د خپلو سیاسي او امنیتي ګټو لپاره د ترهګرۍ په تور کابل ملامتوي، هغوی خپله د ترهګرۍ روزونکي او صادرونکي دي او نړۍ یې باید پر وړاندې اقدام وکړي  او اړ یې باسي، چې په سیمه کې د ناامنۍ مخنیوي لپاره اقدام وکړي. 

د سیاسي چارو کارپوه نیجب الله جامع وايي:« افغانستان د ترهګرۍ قرباني هېواد دی، هغه هېوادونه چې د خپلو سیاسي او امنیتي ګټو لپاره کابل ملامت کوي، چې د دوی هېوادونه ته له افغانستان ناامني ځي،نو نړۍ دې پوه شي،چې دغه بهانې لکه د پاکستان په څير هېوادونو له لوري مطرح کیږي سیاسي دي اوس دې هغه هېوادونه، چې ترهګرۍ صادروي او جرړې یې  د دوی په هېوادونو کې دي او دوی په ترهګرۍ ملامت دي، هڅه باید وشي چې دغه هېوادونه هم ځواب ګو شي او هم په سیمه کې د ناامنۍ د پای لپاره له افغانستان سره ګډ کار وکړي.»

 د سیاسي چارو کارپوه توریالی ځاځی وايي، هغه هېوادونه چې پر افغانستان نیوکې کوي او ځان ته ترې ګواښ احساس کوي دا یو سیاسي تجارت دی،چې د افغانستان کمزورتیا لپاره یې ترسره کوي.

هغه زیاته کړه:« همدا د ترهګرۍ تر نامه لاندې یو شمیر هېوادونه او په ځانګړې ډ ول ګاونډیان پر افغانستان نیوکې کوي،چې دلته باید د ترهګرۍ پر وړاندې مبارزه وشي، دا یوازې یو سیاسي تجارت دی،چې نړیوال هېوادونو او ګاونډیان هغه عمل ترسره کوي،چې افغانستان ونه شي کولی چې په خپلو پښو ودریږي.»

اسلامي امارت په تیرو شااوخوا دوه کلونو کې دا وښوده،چې له وران کارو او وېره خپروونکو پر وړاندې  مبارزه کې جدي دی او ویلي یې دي، چې په افغانستان کې وروستي  بریدونه د بهرنیو اتباعو له لوري ترسره شوي.