افغانستان سره د کشمیر مسلې تړلو په تړاو د پاکستاني چارواکو څرګندونو افغان سیاسیون غوصه کړي.
له افغانستان سره د کشمیر مسالې غوټه کولو په تړاو د پاکستاني چارواکو وروستیو څرګندونو د افغان سیاسونو غبرګونونه راپارولي.
مخکیني ولسمشر حامد کرزي ویلي، ښکاري چې پاکستان د افغانستان په اړه خپل نظر نه دی تغیر کړی.
کرزی وايي، پاکستان اوس هم په سیمه کې خپلو اهدافو ته د رسېدو لپاره، په افغانستان کې د ستراتیژیک عُمق سیاست تعقیبوي.
کرزي په یوه اعلامیه کې له پاکستان نه غوښتي، چې د افغانستان او کشمیر مسالې سره یوځای نه کړي او په سیمه کې د ترهګرۍ له ملاتړ او روزنې او ورانکارو فعالیتونو لاس واخلي.
له بل لوري اسلام اباد کې د افغانستان مخکیني سفیر عمر زاخیلوال ویلي، دا څرګندونې غیر مسئولانه، د غندنې وړ او مضرې دي.
طالبانو هم په یوه اعلامیه کې لیکلي چې د کشمیر مسله په افغانستان پورې هیڅ تړاو نه لري او نه باید افغانستان د نورو هېوادونو د سیالۍ ډګر شي.
همدغو غبرګونو ته په کتو کابل کې د پاکستان سفیر وویل، د کشمیر ستونزه کابل سره تړاو نه لري خو یو اشاره یې دا وه چې هند غواړي سیمه کې د سولې لپاره پیل شوې هڅې سبوتاژ کړي.
