د روسیې بهرنیو چارو وزیر سرګي لارووف په خپلو تازو څرګندونو کې تمه ښودلې،چې اسلامي امارت دې د ټولګډونه حکومت په برخه کې پر خپلو ژمنو عمل وکړي .
لارووف ویلي،د داسې یو ټولګډونه حکمت تمه لري،چې نه یوازې د افغانستان قومونه بلکې ټول افغانان او سیاسي ډلې په کې شاملې وي .
هغه زیاته کړې:« موږ له طالب مشرانو تمه لرو، چې نه یوازې د قومي ډلو بلکې د افغانستان د ټولو غړو او سیاسي ډلو په ګډون سره د ټولګډونه حکومت په تړاو پر خپلو ژمنو عمل وکړي.»
خو اسلامي امارت له وړاندې ویلي،چې حکومت یې ټولګډونه دی او په کابینه کې د ټولو اقوامو او ولایتونو استازي غړیتوب لري.
د سیاسي چارو تحلیل کوونکي بیا په باور دي،هغه هېوادونه چې په افغانستان کې دټولګډونه حکومت چغې وهي، نه یوازې دا چې غواړي له دې لارې د افغانستان په حکومت خپل لاس پوڅي کسان ځای پرځای کړي بلکې د افغانستان په چارو کې مستقمه لاسوهنه وکړي
دوی وايي، د خپله افغانانو په ګډون ټولګډونه حکومت د ټولو خواو غوښتنه ده،خو داسې ټولګډونه حکومت چې تیرې تکراري او تجربه شوې څیرې په کې شاملې نه وي.
د سیاسي چارو تحلیل کوونکی نجیب شمال وايي:« د ټولګډونه حکومت غوښتنه یوازې د روسیې او یا هم د بل هېواد نه ده،بلکې د امریکا ، ملګرو ملتونو ، د سیمې هېوادونو ، ګاونډیو او د خپله افغانانو غوښتنه هم ده، خو د داسې حکومت د رامنځته کولو هدف دا نه دی،چې هغه تیرې څېرې دې راوستل شي،چې په تیرو ۲۰ کلونو کې یې امتحان ورکړی دی او یوازې یې خپلو کورنیو ته خدمت کړی.»
د پوهنتون استاد فیض محمد ځلاند بیا وايي،له اسلامي امارت څخه د ټولګډونه حکومت غوښتنې موخه د اساسي قانون رامنځ ته کول دي،چې پرمټ یې خلکو ته د رایې د ورکړې زمینه برابره شي او همداراز کار اهل کار ته وسپارل شي.
هغه زیاتوي:« له طالبانو د ټولګډونه حکومت غوښتنې هدف دادی،چې اساسي قانون دې د ملي پروسې له مخې رامنځ ته شي،چې ټولو ته د رایې زمینه برابره شي ، د خلکو غوښتنې یې پکې ځای پرځای شي او کار اهل کار ته وسپارل شي،بیا نو نړۍ ته د منلو دی.»
د روسیې بهرنیوچارو وزیر سرګي لاوروف دا هم ویلي،چې امریکا یوځل بیا د افغانستان په کورنیو چارو کې د لاسوهنې هڅې کوي او داسې شواهد شته دي،چې واشنګټن په افغانستان کې داعش ، د ختیځ ترکستان اسلامي غورځنګ او د القاعده شبکې په ګډون د هغو ترهګرو ډلو چې د طالبانو مخالفې دي، ملاتړ کوي.
