د ټاکنو څار بنسټونه د راتلونکو ولسمشریزه ټاکنو په پایلو سر له اوسه جدي اندېښنې لري.
په ټاکنو د څار بنسټونه فیفا او ټیفا وايي، یو شمېر فرعي او محوري ستونزې به راتلونکې ټاکنې له ننګونو سره مخ کړي چې پایلې به یې جنجالي وي.
خو حکومت او د ټاکنو کمېسیون بیا ډاډه دی چې ټاکنې به په خپل وخت په شفاف ډول کیږي.
لږ تر لږه پنځوس ورځې وروسته د سراسري ټاکنو د ترسره کېدو لپاره حکومت او ټاکنو کمېسیون د پوره چمتوالي خبره کوي، خو په ټاکنو د څار بنسټونه د کمېسیونونو او حکومت په ژمنو بې باوره ښکاري.
ټیفا وايي، ګڼې ستونزې لا پر ځای دي چې راتلونکې ټاکنې له ستونزو سره مخامخ کولی شي.
فیفا هم د راتلونکو ټاکنو په وړاندې ستونزې په نښه کړې، دوی د حکومت او کمېسیون په نیولو شویو تدابیرو زیاتې نیوکې نلري، مګر فرعي ستونزې شته چې دا پروسه له ننګونو سره مخ کولی شي.
ناامني، زوراکي او یو لړ نورې ستونزې د فیفا د اندېښنې وړ ټکي دي چې باید په دې برخه کې جدي اصلاحات او کلک تدابیر ونیول شي.
ټاکنو کمېسیون بیا د ټاکنو د ترسره کېدو لپاره له تخنیکي پلوه د پوره چمتوالي خبره کوي، خو امنیت او ځینې نورې ستونزې بیا په خپل صلاحیت کې شامل نه بولي.
خو ځینې شکونه او ګونکسې هم شته چې د سولې خبرو ته په کتو ممکن ټاکنې ونشي، مګر ولسمشر همدا دوه ورځې وړاندې ټاکنې ضروري او حتمي امر وباله.
