د افغان سولې لپاره د امريکا ځانګړی استازی له دوحې څخه نوي ډيلي ته تللی.
زلمي خليلزاد ويلي، د سفر موخه یې د افغان سولې په برخه کې د هندي چارواکو سره خبرې او د هند ملاتړ جلبول دي.
خلیلزاد له طالبانو سره له خپلو وروستیو خبرو رضایت ښودلی او ویلي یې دي، چې امریکایي او طالب مرکچیانو تخنیکي ټیمونه به د ده په نشتون کې خپل کار ته دوام ورکوي.
که څه هم د دواړو خواو ترمنځ د اتم پړاو خبرې لا هم روانې دي، خو ګومان نه کېږي چې له لوی اختر وړاندې به کومه هوکړه یا جوړ جاړی رامنځته شي.
خلیلزاد ویلي، دواړه خواوې پر هغو تخنیکي جزئیاتو کار کوي چې له مخې به یې له څلورو برخو جوړه یوه هوکړه وشي.
د خلیلزاد او برادر ناسته
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد او په قطر کې د طالبانو د سیاسي دفتر مشر ملا عبدالغني برادر په قطر کې د بندو دروازو تر شاه څلور ساعته خبرې کړي.
بي بي سي وایي، خبریال یې په دوحه کې له یوه طالب چارواکي سره خبرې کولې چې ملا برادر راغی او ورپسې زلمی خلیلزاد راورسېد چې په ګیله منه بڼه یې طالب غړو ته وویل ولې له یوه خبریال سره غږېږئ.
د بي بي سي خبریال ویلي، په همدې خبرې سره دواړو لورو خپل ټیلېفونونه قطري امنیتي مامورینو ته ورکړل او د بندو دروازو تر شاه خلیلزاد او ملا برادر ۴ ساعته خبرې وکړې.
له دې سره ویل کېږي چې د دوحې خبرې ښايي دوه ورځې نورې هم وغځیږي.
