تېره میاشت خبریالانو سره د تاوتریخوالي ۴۰ پېښې ثبت شوي دي.
په تېرې جولای میاشت کې د خبریالانو پر وړاندې د تاوتریخوالي، وژنې او ناسم چلند څلوېښت پېښې ثبت شوي دي.
د خبریالانو د خوندیتوب کمېټه د رسنیو پر وړاندې وروستیو بریدونو اندېښمنه کړې او د جګړې له ښکېلو غاړو نه غوښتنه لري، چې د خبریالانو خوندیتوب ته دې پام وکړي.
د یکشنبې په مازدیګر د خورشید تلوېزیون پر کارکوونکو بمي چاودنه وشوه، چې په کې د عامو خلکو تر څنګ یې شپږ کسانو ته مرګ ژوبله واړوله.
دغه برید په کور دننه او بېرون غبرګونونه پارولي دي.
ولسمشر محمد اشرف غني پر رسنیو او ملکیانو بریدونه جنګي جرم بللی او افغانستان کې د اروپايي ټولنې سفیر پیري مایډون ویلي، چې د ژورنالستانو د خاموشه کولو هڅې به هغوی نور هم غښتلي کړي.
د خورشید ټلویزیون پر موټر د تیرې ورځې چاودنه کې دوه کسان ووژل شول او څلور نور ټپیان شول.
وژل شوي دوه کسان د خورشید ټلویزیون کار کوونکي نه دي خو د څلورو ټپیانو له ډلې درې تنه یې د خورشید ټلویزون کار کوونکي دي.
