له افغانستان څخه د بهرنیو ځواکونو د وتو پر سر د واشنګټن او پینټاګون جنجال راپورته شوی دی.
د امریکا جنرالان نه غواړي د دوی پوځونه دې له افغانستان بهر شي، خو د ټرمپ سلاکاران وایي، له افغانستان څخه د ځواکونو وتل یې شرایطو پورې اړه لري.
په قطر کې د امریکا او طالبانو د اتم پړاو خبرې په دویمه ورځ هم روانې دي خو طالبانو ویلي، ممکن خبرې لا څو نورو ورځو لپاره هم له امریکا سره دوام وکړي تر څو د سولې په اړه یوې هوکړې ته ورسېږي.
خو دې خبرو په اړه اېن. بي. سي په مرکه کې د اوسنیو او پخوانیو پنځو ملکي او پوځي امریکايي چارواکو له قوله لیکلي ((ډونالډ ټرمپ خپلو سلاکارانو ته ویلي چې هغه د امریکا له ولسمشریزو ټاکنو وړاندې له افغانستان څخه د خپلو ټولو سرتېرو ایستل غواړي. دغه ضرب الاجل د امریکا په بهرنیو چار او دفاع وزارتونو کې د چارواکو تر منځ اختلاف پیدا کړی چې کله باید دغه چاره ترسره کړي.))
((افغانستان کې د امریکايي ځواکونو د قوماندان جنرال سکاټ مېلر په شمول د امریکا پوځي چارواکي غواړي چې باید له افغانستانه ټول ځواکونه و نه ایستل شي او د هغه پلان مخالفت یې ښودلی چې باید په پنځلسو میاشتو کې دې امریکايي ځواکونه افغانستان بشپړ پرېږدي. مېلر غواړي چې یو شمېر ځواکونه دې د داعش او القاعده خلاف جګړې لپاره دلته پاتې شي.))
دغه راز ویل شوي دي د امریکا د بهرنیو چارو وزارت په شمول یو شمېر امریکايي چارواکي وارخطا دي؛ که دوی له افغانستانه د ځواکونو د وتلو پلان و نه لري؛ ټرمپ به په ناڅاپي توګه ټول ځواکونه وباسي.
د امریکا دفاع وزارت ویاندې ریبیکا ریباریچ داسې ویلي (( په افغانستان کې زموږ سټراټیژي شرایطو پورې تړاو لري. زموږ مناسب اندازه سرتېري به په افغانستان کې پاتې شي چې د هغوی موجودیت د امریکا ګټې خوندي وساتي.))
له دې سره د امریکا د بهرنیو چارو وزارت ویلي چې د امریکايي ځواکونو وتل شرایطو ته په کتو ترسره کېږي.
د امریکا د پوځ پخواني مرستیال جنرال جیک کیین ویلي (( له طالبانو سره د سولې د مذاکراتو په برخه کې ستونزه نه شته او موږ د هرې جګړې پای کې له دښمن سره خبرې کړې دي. له طالبانو سره باید د امریکا د ګټو پر بنسټ خبرې وشي او د امریکا ګټې دا دي چې داعش او القاعده باید په افغانستان کې خوندي ځایونه و نه لري.))
افغان ولسمشر غني چې هوایي ځواکونو ته یې وینا کوله په وسلوال پوځ یې امر دا و، چې تر څو چې سوله کېږي وسلوال دې د بریدونو لاندې ونیسي او هیڅکله به د جمهوریت پرسر معامله ونه مني.
امریکا او طالبان د خپلو خبرو نچوړ نه دی شریک کړی خو داسې ښکاري چې د سولې په اړه هوکړه کېدونکې ده او امریکا نور افغانستان کې د جګړې برخه نه شي تمویلولی.
