د کندهار په شپږو ولسوالیو کې د ټاکنو مرکزونه د تړلو ګواښ سره مخ دي.
د کندهار په معروف ولسوالۍ کې په بشپړ ډول ټاکنې نه کېږي، او په شپږو نورو ولسواليو کې د لوړ امنیتي ګواښ له امله د ټاکنو مرکزونه د تړلو له ګواښ سره مخ دي.
د کندهار معروف ولسوالي چې په دې وروستیو کې په پرلپسې ډول د خونړيو جګړو او بریدونو راپورونه ترې ورکړل شوي؛ دا ځل یې اوسېدونکې په راتلونکو ولسمشريزو ټاکنو کې له ګډون څخه بې برخې دي.
د کندهار د ټاکنو کمېسیون مسوولين وايي، د ناسم امنیتي حالت له امله په معروف ولسوالۍ کې ټاکنې نه شي کېدلی او یو شمېر نورې ولسوالۍ هم له امنيتي ګواښونو سره مخ دي.
د کندهار د ټاکنو رياست عملياتي امر عبدالباقي نظري داسې وايي (( تاسې خبر یاست د کندهار معروف ولسوالۍ ته چې ټاکنیز مواد موږ رسولي وو، هغه په بشپړه توګه سقوط شوه او ټاکنې په کې نا ممکنې دي. له معروف سربېره غورک، ښورابک، نېش، میانشین او ریګستان ولسوالۍ دي چې د ټاکنو مرکزونه په کې د تړلو ګواښ سره مخ دي. او میوند، خاکرېز او شاولیکوټ کې بیا امنیتي ګواښونه شته خو ډېر د اندېښنې نه دي.))
د کندهار ولایتي مسوولين وايي، په هغو ټولو نا امنه ولسواليو کې یې چاڼیز عملیات پیل کړي چې اوسېدونکي یې د ټاکنو د امنیت په اړه اندېښنې لري.
د کندهار مرستیال والي وايي، افغان ځواکونو په دغو ولسواليو کې د راتلونکو ولسمشریزو ټاکنو د امنیت لپاره پوره چمتووالی نيولی دی.
د کندهار د والي مرستیال عبدالحنان منیب داسې وویل (( زه ډاډ درکوم چې د کندهار ولایتي اداره به امنیتي مسوولینو سره په همغږۍ هغه ګواښونه له منځه یوسي چې او ولسونو ته به زمینه مساعده کړي چې په ټاکنو کې پراخ ګډون و کړي.))
کندهار کې د ټاکنو کمېسیون د معلوماتو له مخې په پارلماني ټاکنو کې يې ١٧٣ د رايو مرکزونه درلودل چې له دې ډلې څخه يې دوه مرکزونه تړلي وو، خو دا ځل تر اوسه پورې اووه مرکزونه تړلي دي او که نا امنۍ هم داسي دوام وکړي ښايي دغه شمېر نور هم لوړ شي.
