د امریکا په تکزاس ښار کې ۲۰ تنه په ډزو وژل شوي دي.
د تکزاس ښار چارواکي وايي، په تیرو څو لسیزو کې په تکزاس کې دا پیښه بې سارې وه.
امریکا کې خلک بیا د وسلې پر ازاد پېر او پلور نیوکه کوي چې د داسې پېښو سرچینه له همدې بې پروايۍ له امله پیدا کيږي.
د امریکا د تکزاس ښار په اېل پاسو سیمه کې وسله وال برید شوی دی.
د تکزاس اوسیدونکي وايي، یو وسله وال کس یوه پلورنځي کې ډزې وکړې چې له امله یې ۲۰ تنه وژلي او لسګونه نور ټپیان دي.
د تکزاس ایالت والي له پیښې وروسته رسنیو ته و ویل چې دا له کرکې ډک برید دی او کومه ترهګریزه موخه نه لري.
د تکزاس والي، ګرېګ ابوټ وویل، ((دا ډیره بده ده. هیڅ د منلو وړ نه ده. دا ډول بریدونه او بدې پیښې به پر ټول ښار بده اغیزه وکړي او دا له کرکې ډک کار دی. ما تر اوسه شواهد نه دي لیدلي او د شواهدو له لیدو وړاندې زه څه نه شم ویلی. زه باید تاسې ته و وایم چې داسې جرمونه، داسې اعمال او داسې مفکورې د تکزاس استازیتوب نه کوي.))
د اېل پاسو سیمې ښاروال وايي د دوی ښار کې د شلو کسانو په یو ځل وژل کیدل ډیر نا اشنا دي او وړاندې یې داسې حالت نه و تجربه کړی.
د اېل پاسو ښاروال، ډي مارګو وویل، ((زه نه پوهیږم ، موږ کله د ۲۰ کسانو جنازې ته نه و چمتو، کله مو دا کار نه دی کړی. زه هیله لرم چې بیا داسې حالت سره مخ نه شو خو موږ باید دا هرڅه وزغمو او مخکې ولاړ شو.))
عیني شاهدان وايي، یو تن چې سپکه وسله ورسره وه په عامه ځای کې یې پر خلکو ډزې پیل کړې چې له امله یې ډیر کسان مړه شول. د تکزاس پولیس بیا وايي، شکمن کس یې پیژندلی چې ۲۱ کلن سپین پوستی ځوان دی چې د تکزاس د دالاس سیمې اوسیدونکی دی. چارواکو د وسله وال په تړاو نور جزییات نه دي ورکړي خو وايي له څیړنو وروسته به هرڅه خپاره کړي.
اخوا په امریکا کې د وسلې پر ازاد پېر او پلور نیوکې دي او د ټولو بدبختیو سرچینه همدا ګڼل کیږي.
