ولسمشر غني د هوایي ځواک قوماندانۍ له نوي مرکز څخه په لیدنه کې، امنیتي مسوولینو ته سپارښتنه کړې، ترڅو چې د سولې مذاکرات پیلیږي، د مخالفینو په ځپلو دې تمرکز وکړي.
ولسمشر چې په یاده لېدنه کې د افغان امنیتي او دفاعي ځواکونو ستاینه کوله، هېله ښودلې چې افغانستان به ډیر ژر تلپاتې سولې، امنیت او ثباته ورسیږي.
ولسمشر دغه راز په شفافو او ټول شموله ټاکنو ټینګار کړی او سپارښتنه یې کړې چې امنیتي ځواکونه به یوازې امنیتي او لوژستیکې برخه کې مرسته وکړي.
له دې سره د امریکایانو او طالبانو ترمنځ نن هم قطر کې خبرې دوام لري.
دا خبرې د شنبې په ورځ د قطر په سیمه ییز وخت لس بجې پیل شوې او نن یکشنبه به هم په بیلا بیلو مسایلو بحثونه وشي.
د طالبانو د قطر دفتر ویاند سهیل شاهین ویلي، خبرې پيل شوې دي خو د ستونزو د حل او لا ډېر بحث لپاره به څو ورځې دوام کوي.
ټاکل شوې چې په دې پړاو خبرو کې به د طالبانو او امریکا ترمنځ د افغان جګړې د پای ته رسولو هوکړه لاسلیک شي.
د قطر دفتر مرستیال عبدالسلام حنفي بیا وایي، چې له امریکا سره تر توافق وروسته به له افغان لوري سره مذاکرات پيل شي.
دده په وینا په توافق کې د ټولو بهرنیو ځواکونو وتل شامل دي او تر دې توافق وروسته د جګړې پر داخلي بعد خبرې کېږي.
