ګوتریش: د دوحې ناسته د ا.ا رسمیت پېژندنې لپاره نه وه جوړه شوې

د ملګرو ملتونو عمومي منشي انټونیو ګوتریش د دوحې ناستې په پای کې په یوه خبري کنفرانس کې ویلي، د دوحې ناسته د اسلامي امارت رسمیت پېژندلو لپاره نه، بلکې د یوه ګډ نړیوال دریځ د رامنځته کولو لپاره جوړه شوې وه.

ګوتریش زیاته کړې، په دغه ناسته کې د سیمې او نړۍ هېوادونه د افغانستان په اړه پر یوې ګډې تګلارې سلا شوي دي.

نوموړي که څه هم د دې ګډې تګلارې او دریځ په اړه ډېر جزئیات نه دي ورکړي،خو په وینا یې راتلونکې کې به ورته بله ناسته هم جوړه کړي،خو د وخت او ځای په اړه یې مالومات نه دي ورکړي.

د هغه په وینا د دې ناستې ګډونوالو هوکړه کړې،چې له اسلامي امارت سره ښکېلتیا لپاره یوې داسې ستراتېژۍ ته اړتیا ده،چې د افغانستان له ثبات او همدا راز د نورو مهمو اندېښنو ځوابولو سره مرسته وکړي.

ګوتریش همدارنګه ویلي،د دغې ناستې ګډونوالو د ترهګرو ډلو حضور، د پراخ بنسټه حکومت پر نشتوالي،د ښځو او نجونو پر وړاندې د سرپرست حکومت د وروستیو پرېکړو په ګډون د بشري حقونو وضعیت او نشه ‌يي توکو په هکله اندېښنې څرګندې کړې.

انټونیو ګوتریش د افغانستان اوسنی وضعیت دا مهال نړۍ کې تر ټولو ستر بشري کړکېچ یاد کړی او په وینا یې ۹۷ سلنه افغانان بې وزلۍ کې ژوند کوي او دا چې دوه پر درېیمه برخه افغانان به چې ۲۸ میلیونه کېږي، د ژوندي پاتې کېدو لپاره سږ کال بشري مرستو ته اړتیا ولري.

د ګوترېش په وینا شپږ میلیونه افغانان،چې ماشومان او‌ ښځې هم په کې شاملې دي، لوږې ته له ورته وضعیت یوازې یو ګام لرې دي.

د ملګرو ملتونو عمومي منشي ویلي،دغو اړمنو خلکو ته د رسېدو لپاره ۶.۴ میلیارد ډالرو ته اړتیا لري،په داسې حال کې چې نږدې ۲۴۹ میلیونه ډالره ترلاسه شوي،چې د ټولې اړتیا وړ بودیجې یوازې ۴.۶ سلنه جوړوي او د بشري مرستو لپاره بودیجه یوازنۍ اندېښنه نه ده.

د نوموړي په وینا په افغانستان کې د دوی د بشری مرستو ډېری ویشونکي افغانان او ښځې دي،چې د ښځو پر کار وروستی بندیز هم د خلکو ژوند له ګواښ سره مخ کړی او په وینا یې د ښځو او نجونو پر حقونو د دوامداره سیستماتیکو بریدونو په تړاو غلي نه پاتې کېږي.