ولسي جرګې د نیمايي مالي کال بودجه رده کړه او غیرمعیاري یې وبلله.
د دیارلس سوه اته نویم مالي کال نیمايي بودجه چې د ولسي جرګې په اختصاصي کمیسیونونو کې تربحث لاندې د تاید او رد لپاره د ولسي جرګې تالار ته وړاندې شوه، ډیرو وکیلانو غیرمعیاري بلله او رد یې کړه.
د ولسي جرګې مالي او بودجې کمیسیون رییس عظیم محسیني داسې وویل (( د بودجې بررسي کې وارد شوي تغییرات د اندېښنې او غیر معیاري دي او همدا لامل دی چې د ملي ګټو سره سمون نه خوري))
مالیې وزارت بیا وايي دغه بودجه د افغانستان وضیعت ته په کتو برابره شوې او د هغو پروژو پیسې چې ادارو یې د پلي کولو وړتیا نه درلوده نورو برخو ته لیږدول شوي دي.
له دغو ټولو بحثونو وروسته د نیمايي کال بودجه رایې اچونې ته وړاندې شوه او د وکیلانو له لوري د رایو په اکثریت رد شوه .
په ورته وخت کې ځینو وکیلانو د ملکي تلفاتو د کچې په لوړوالي هم خبرې وکړې او له حکومت یې وغوښتل چې د عملیاتو پرمهال د ملکيانو ژوند ته پام وکړي.
تازه په غوربند او د اروزګان په یو شمیر ولسوالیو کې د افغان ځواکونو په هوايي بریدونو کې ملکيانو ته مرګ ژوبله اوښتې چې سپین ګیري او ماشومان هم پکې شامل دي .
