ټاکنو ته شرایط نه دي برابر او باید سولې ته لومړیتوب ورکړل شي.
افغانستان کې د لومړي ځل لپاره سایه یا سیوري په نوم پارلمان رامنځ ته شوچې یوسلو پنځوس غړي لري او ټول یې د ملي شورا د پنځه لسمې او شپاړسمې تقنیني دورې استازي دي .
ددغه پارلمان د جوړېدو موخه له ملي شورا سره مرسته او د اصلاح لپاره یې پرچارو نیوکه ده .
د سیوري یا سایه په نوم تازه رامنځ ته شوی پارلمان له امریکا غواړي چې دسولې په تړاو د پردې ترشا ټول مسایل باید له افغان ولس سره شریک شي .
د دغه پارلمان غړيو یوه سپارښتنه دا وه چې طالبانو سره د سولې خبرو لپاره دې د جګړو قربانیان مخکې شي نه هغه کسان چې شخصي ګټو ته پر ملي هغو ترجیح ورکوي.
د سایه پارلمان لومړی مرستیال صالح محمد سلجوقي داسې وايي (( د یوې مجمعې په توګه را ټول شوي یو، او د سایه پارلمان غړي به خپلې تجربې نوي پارلمان سره شریکوي څو ګته ترې واخلي.))
د دې پارلمان غړي وايي افغانانو ته ددې زمینه نده برابره چې ټاکنو کې ګډون وکړي او باید ددې پرځای سولې ته ترجیح ورکړل شي او داسې کسان دې د سولې خبرو لپاره معرفي شي چې د خپلو شخصي ګټو پرځای ورته افغانستان لومړیتوب ولري.
د سایه پارلمان غړی نذیر احمدزی او رئیس یې همایون همایون داسې وویل (( د جګړې هغه متضررین چې په جګړه کې یې شهیدان ورکړي او کورنۍ یې ختمې شوي دي، هغه کسان دې لاړ شي او هلته دې خبرې وکړي نه هغه کسان چې د خپلو شخصي ګټو لپاره لابي او کار کوي،،، شرایطو ته په کتو فکر کوم راتلونکي انتخابات به یو نمایشي انتخابات وي د ټاکنو لپاره شرایط نه دي برابر موږ له نړیوالې ټولنې او بهرنیانو غواړو چې د سولې په تړاو افغان ملت ته ټول مسایل واضح کړي.))
دلته د ولسمشرۍ ټاکنو پر نوماندانو هم نیوکې وشوې چې ګني ځانونه یې نومولي خو له اساسي قانون خبر نه دي، د ځینو ټکټونو شریکان د قانون خلاف د اجرایه ریاست او صدارت څوکۍ وړاندیزونه هم کړي دي .
په افغانستان کې دا لومړی ځل دی چې دسایه یا سیوري په نوم پارلمان رامنځ ته کیږي خو په نورې نړۍ کې داسې پارلمانونه فعال دي او د حکومت له لوري یې ملاتړ کیږي .
