مجاهد: د ترهګریزو ګواښونو په اړه د سیمې هېوادونو اندېښنې بې ځایه دي

د روسیې دفاع وزیر سیرګي شویګو هند کې د شانګهای همکاریو سازمان غونډې پرمهال ادعا کړې،چې افغانستان  کې میشتې سخت دریځې ډلې مرکزي آسیا ته هم ګواښ پېښوي او له نړیوالې ټولنې یې غوښتي دي،چې د دې ګواښونو له منځه وړلو کې یو لاس شي.

شویګو زیاته کړې:« ډېری هغه سخت دریځې ډلې چې په افغانستان کې اوسي اصلي ګواښ پېښوي او خپله ایډیالوژي د سیمې دیموکراتو هېوادونو ته خپروي. زموږ په اند د افغانستان موضوع باید د شانګهای همکاریو سازمان په اجنډا کې ځای پیدا کړي. یوازې سیمه ییزه او نړیواله همکاري کولی شي، د هغو ستونزو په حل کې مرسته وکړي،چې افغانستان ورسره په یوازې توګه مخ دی.»

د اسلامي امارت ویاند ذبیح الله مجاهد بیا د شویګو څرګندونو ته په غبرګون کې ویلي،چې د افغانستان امنیتي ځواکونو نه یوازې د هېواد دننه امنیت ټینګ کړی، بلکې د نورو وسله والو پر وړاندې یې هم کلکه مبارزه کړې ده.

مجاهد زیاته کړې:« د افغانستان اسلامي امارت د روسیې فدراسیون د دفاع وزیر سرګي شایګو هغه څرګندونې ردوي، چې ګواکې له افغانستانه وسلوالې ډلې د منځنۍ اسیا هېوادونو امنیت ته لوی ګواښ پيښوي.»

مجاهد وايي، د سیمې هېوادونه باید د خپلو هغو وګړو مخه ونیسي،چې له پولي اوړي او افغانستان کې دننه ترهګریز فعالیتونه پر مخ وړي.

هغه زیاتوي:«له بده مرخه باید ووایو،چې په افغانستان کې د نا امنۍ څو وروستۍ پېښې د سیمي ځینو هېوادونو د اتباعو له لوري ترسره شوي دي، دا ستونزه رامنځته کوي، چې دغه حکومتونه خپل مسوولیت ادا کړي.»

شنونکي هم په دې اند دي،چې هېواد کې تېرو څلورو لسیزو ناخوالو کې د سیمې او ګاونډیو هېوادونو ونډه ډېره بارزه ده او له دې هېوادونو غواړي،چې د افغانستان په هکله مثبت فکر او دریځ خپل کړي.

د روسیې لخوا د افغانستان امنیتي وضعیت په اړه دا اندېښنې داسې مهال  کېږي،چې څو ورځې وړاندې یې بهرنیو چارو وزیر سرګي لاوروف طالبان د افغانستان حقیقت یاد کړی وو او له دوی سره یې خبرې حتمي بللې وې.