یوناما وايي، په تېرو شپږ میاشتو کې نږدې ۴زره ملکي وګړو ته مرګ ژوبله اوښتې.
کابل کې د ملګرو ملتونو مرستندويه اداره يا (يوناما) وايي، د روان ميلادي کال په نيمايي کې نږدې څلور زره ملکيانو ته مرګ ژوبله اوښتې ده.
د ملکي مرګ ژوبلې اته دېرش سلنه پړه پر طالبانو اچول شوې، خو طالبانو د یوناما دا راپور یو طرفه یاد کړی دی.
یوناما د ۲۰۱۹ کال په لومړيو شپږو مياشتو کې د ملکي تلفاتو ارقام د سه شنبې په ورځ له رسنيو سره شريک کړل.
په دغه راپور کې داسې ښکاري چې د تېر کال همدې مودې په پرتله د ملکي وګړو د مرګ ژوبلې ګراف ټيټ دی.
د يوناما راپور کې راغلي ((۳۸ سلنه مرګ ژوبله د طالبانو لخوا رامنځته شوې، چې ۴۲۳ تنه يې وژلي او ۱۰۱۴ يې ټپيان کړي دي، ۱۸ سلنه مرګ ژوبله د افغان امنيتي ځواکونو لخوا رامنځته شوې، چې ۲۶۳ يې وژلي او ۴۲۲ نور يې ټپيان کړي، ۱۲ سلنه د نړيوالو ځواکونو لخوا رامنځته شوې، چې ۳۱۴ يې وژلي او ۱۴۳ نور يې ټپيان کړي دي، ۱۲سلنه په مشترکه توګه رامنځته شوې، چې ۱۱۸ يې وژلي او ۳۲۹ يې ټپيان کړي، ۱۱ سلنه يې داعش ډلې لخوا رامنځته شوې، چې ۸۹ يې وژلي او ۳۳۴ نور يې ټپيان کړي .))
د ملي امنيت شورا ویاند کبير حقمل داسې وویل (( د یوناما دې رپوټ یو وار بیا ثابته کړه، چې د ملکیانو د مرګ ژوبلې ډېره برخه د دولت د مخالفینو لخوا رامنځته شوې، دوی ملکیان په نښه کوي او هغوی د سپر په توګه استعمالوي، افغان امنیتي او دفاعي ځواکونه په عملیاتو کې له ډېر احتیاط کار اخلي، موږ پر دولتي او دولت پلوو ځواکونو ډېر قیودات وضع کړي او دا مو ترې غوښتي چې د جګړې پرمهال باید اصول او قوانین مراعات شي.))
طالبانو بیا د یوناما راپور یو طرفه او له حقیقت لیرې یاد کړی دی.
طالبانو ویلي ))د طالبانو له لوري په ملکي خلکو باندې په هيڅ ځای کې هم قصدي او هدفي برید نه دی شوی. خو د یوناما په راپور کې بیا هم اسلامي امارت ته د ټولو ملکي تلفاتو ۳۸ سلنه٪ منسوب شوې چې په واقعیتونو ولاړه نه ده ((.
يوناما له ښکېلو خواو غوښتي، چې ملکي مرګ ژوبلې ته جدي پاملرنه وکړي او د قطر بين الافغاني ناستې هوکړې ته درناوی وکړي.
