طالبانو سره مخامخ خبرو لپاره په مرکچي پلاوي کار پيل شوی.
له طالبانو سره د مخامخ خبرو لپاره پر یو ټول شموله مرکچي پلاوي کار روان دی.
د سولې په چارو کې د دولت وزارت وایي، له ټولو ښکېلو اړخونو سره مشورې روانې دي چې داسې مذاکره کوونکی پلاوی جوړ کړي چې وکولی شي د هېواد د ټولو وګړو، سیاسي او ټولنیزو اقشارو استازیتوب وکړي.
سلام رحیمي ویلي، دغه پلاوی به له طالبانو سره د مخامخ خبرو اترو لپاره چې نږدې راتلونکی به ترسره شي، چمتووالی ولري.
رحیمي وایي، د سولې پروسه د ټولو افغانانو پورې تړاو لري.
بل پلو په قطر کې د طالبانو د سیاسي دفتر ویاند سهیل شاهین په خپل ټویټر لیکلي، چې د بهرنیو ځواکونو د وتلو مهالویش له اعلان وروسته به د ټولو سیاسي جهتونو له ګډ مذاکراتي ټیم سره بین الافغاني مذاکرات پيل کړي.
شاهین ویلي، د کابل اداره به د حکومت په توګه نه، بلکې د نورو سیاسي جهتونه په څیر یو جهت وي .
