د هلمند امنیتي مسوولین وايي طالبان هڅه کوي نادعلي سقوط کړي خو دوی به یې دې کار ته پرې نږدي.
طالبانو د ناعلي ولسوالۍ پر امنیتي کمربندونو خپلو بریدونو ته زور ورکړی خو حکومت بیا په مارجې ولسوالۍ کې چاڼيز عملیات پیل کړي ځکه د دې ولایت شپږ ولسوالۍ له طالبانو سره دي.
د نادعلي سرپرست ولسوال بریالی نظري وایي طالبان هڅه کوي چې دا ولسوالۍ سقوط کړي خو وایي مخه یې نیول شوې ده.
اندېښنه دا ده که دغه ولسوالۍ سقوط شي مرکز لښکرګاه به خوندي نه وي.
د نادعلي امنیه قوماندان وایي طالبانو ځکه د دې ولسوالۍ پر ډېری سیمو کې خپلو بریدونو ته زور ورکړی چې مهمه ده خو وایي تر اوسه یې د طالبانو ډيری بریدونه شنډ کړي دي.
سره له دې چې د دې ولایت ډېری سیمې له دولتي واکه وتلي خو د هلمند والي وایي په دې ورستیو کې یې د طالبانو مالي سرچینې په نښه کړي چې له امله یې د طالبانو جنګي ماشین هم له ماتي سره مخ کړی دی.
طالبانو د نادعلي ولسوالۍ پر امنیتي کمربندونو په داسې حال کې خپل بریدونه ډير کړي چې له څو ورځو راهیسې حکومت هم خپل عملیاتو او بریدونو ته زور ورکړی دی خو طالب ویاند قاري یوسف احمدي دا ردوي چې د طالبانو مالي سرچینې لمنځه تللي او د دوی جګړه دې کمزورې شوي وي او دغه ډول څرګندوني تبلغات بولي.
