د کورنیو چارو وزارت وايي، د پنجشنبې په سهار په کابل ښار کې درې پرله پسې چاودنې شوي چې په کې لږترلږه یوولس تنه وژل شوي او ۴۵ نور ټپیان دي.
د عامې روغتیا وزارت ویاند وحیدالله مایار ویلي، په وژل شویو کې پنځه ښځې او یو ماشوم شامل دی.
عیني شاهدان وایي، لومړی د کارکونکو پر کاسټر موټر د شپاړلسمې حوزې اړوند ملي بس څلور لارې ته څېرمه ځانمرګی برید شوی ده.
د کورنیو چارو وزارت وایي، چې له ځانمرګي برید وروسته کله چې سیمې ته خلک راټول شول بله چاودنه وشوه .
د کورنیو چارو وزارت وایي چې بله موټر بم چاودنه وه چې د نهمې حوزې اړوند سیمه کې شوې ده.
طالبانو د نهمې حوزې موټر بم چاودنې مسوولیت منلی دی او ویلي یې دي چې د برید موخه د بهرنیو ځواکونو کاروان و.
