د پاکستان لومړی وزیر وایي، افغاستان کې ستراتیژیک عمق نه غواړي.
امریکا کې د سولې انستیتوت ته په وینا کې عمران خان ویلي، افغانستان کې نور د نه لاسوهنې سیاست غوره کوي.
عمران خان ویلي، د امریکا له سفر وروسته به پاکستان کې طالبانو سره خبرې وکړي چې له افغان حکومت سره سولې ته لاړ شي.
دې څرګندونو ته په کابل کې غبرګون دادی چې پاکستان افغانستان کې د نوې لوبې د پیل په لټه کې ده.
د افغانستان په اړه د امریکایي ولسمشر له تندو خبرو ورسته د پاکستان د لومړي وزیر څرګندونې هم غبرګونونه لري.
هغه امریکا کې د سولې انستیتوت ته په وینا کې ویلي، افغانستان کې ستراتیژک عمق نه غواړي خو سیاست به یې د نه لاسوهنې وي.
د پاکستان لومړي وزیر عمران خان داسې ویلي (( افغانستان کې د پاکستان د ستراتېژیک عمق ترلاسه کولو هڅو خپله پاکستان ته زیان اړولی او اوس پاکستان په افغانستان کې د نهلاسوهنې پالېسي خپله کړې.))
اوس له دې ښکاري چې پاکستان غواړي د امریکا له لوري بندې شوې پیسې بیا د دوی بانکونو ته ورشي.
خو باور کېږي چې امریکا په سیمه کې پاکستان ته نوې پروژې ورکړي او دغه هېواد د واشنګتن د حساب وړ ملګری دی.
د مشرانو جرګې غړی زلمی زابلی داسې وايي (( ښايي امریکا پاکستان ته ویلي وي چې هغه دوه میلیارده ډالر چې واشنګټن پر اسلام اباد درولي و هغه هم درکوو ، تاسو چې سیاسي منزوي واست نور به منزوي هم نه یاست او هماغه پخوانۍ دوستي به مو وي، دوی مشترکې ګټې تقسیم کړي او اوس وايي چې موږ په افغانستان کې ستراتیژیک عمق نه غواړو.))
پاکستان له پخوا افغانستان کې د ستراتیژیک عمق په لټه کې و خو د تاوتریخوالي لپاره یې هند یوه بهانه ګرځولې ده. پاکستان یوازې د امریکا لپاره بدل شوی دی، په دې هېواد د یو ښه ګاونډي حساب او باور هغه وخت کېدای شي چې افغانستان کې تاوتریخوالی کم شي.
