پاکستان غواړي په اغزن سیم پښتانه قومونه بېل کړي.
د ملي دفاع وزارت وايي٬ پاکستان د اغزن تار په وسیله د ترهګرو مخه نشي نیولې او په همدې پلمه هڅه کوي چې پر ډیورنډ کرښه پراته قومونه سره جلا کړي.
د دفاع وزارت د پاکستان د پوځ د څرگندونو په غبرگون کې وایي٬ اغزن تار نشي کولای د ترهګرو ډلو مخه افغانستان ته ونیسي.
د پاکستان د پوځ ویاند ویلي و، چې افغانستان سره په پوله د اغزن سیم غزولو امنیتي وضعیت ښه کړی او ترهگریزې پیښې یې پرله پسې کمې کړي.
د دفاع وزارت ویاند روح الله احمدزی وايي٬ پاکستان د ترهګرۍ مرکز دی او د پاکستان صادقانه همکاري د ترهګرو ډلو فعالیتونه ختمولای شي نه اغزن سیم او کټارې.
د هیواد د شرقي ولایتونو اوسیدونکي د پاکستان اغزن تار د ترهګرو د مخنیوي لپاره اغزمن نه ګني خو زیاتوي یوازې غواړي پاکستان په دې کار سره دوه قومونه سره بیل کړي.
د افغانستان حکومت تل پاکستان د ترهگرو ډلو په زده کړو، تمویل او تجهیز ملامتوي او ویلي یې دي چې ترهگرې ډلې په پاکستان کې پناه ځایونه لري او په هغه هیواد کې خپل بریدونه پلان کوي او په افغانستان کې یې عملي کوي.
خو پاکستان تل دغه تورونه رد کړي او ځان د ترهگریزو بریدونو قرباني گڼي.
