د یکشنبې په سهار د خېبر پښتونخوا په ډېره اسماعیل خان کې دوه بېلابېلو بریدونو اته تنه ووژل او ۳۰ نور یې ټپیان کړل.
د الجزیرې د راپور له مخې ډېره اسماعیل خان کې لومړی بریدګرو پر یوې امنیتي پوستې برید کړی چې دوه پولیس یې وژلي او وروسته بیا یوې ښځینه ځانمرګې بریدګرې هغه مهال ځان ته چاودنه ورکړه چې وژل شوي پولیس روغتون ته لېږدول کېدل.
د سیمې د پولیسو مشر سلیم ریاض ویلي، (( پر امنیتي پوستې برید کې دوه پولیس او په ځانمرګي برید کې بیا څلور ملکیان وژل شوي دي.))
ریاض زیاته کړې، ځانمرګي برید کې لږترلږه ۳۰ تنه ټپیان دي.
دغه برید داسې مهال ترسره کېږي چې د پاکستان لومړی وزیر عمران خان په درې ورځني سفر امریکا ته تللی دی.
عمران خان به هلته له ولسمشر ټرمپ او نورو لوړپوړو چارواکو سره وګوري او د افغان سولې بهیر په ګډون به په دوه اړخیزو موضوعاتو هم بحث وکړي.
