ټاکل شوې د طالبانو او امریکا متحده ایالاتو ترمنځ یوځل بیا د سولې پړاو خبرې څلور ورځې وروسته په قطر کې پیل شي.
د قطر بین الافغاني ناستې ګډونوالو ویلي، د امریکا او طالبانو تر منځ اووم پړاو خبرو کې د سولې وروستۍ هوکړه کېږي او په وینا یې ښایي خلیلزاد او طالبان د چین، فرانسې، روسیې او یو شمېر نورو هېوادونو د استازو په حضور کې هوکړه لاسلیک کړي.
د قطر بین الاافغاني ناستې ګډونوال وحیدالله سباوون او عبدالله قرلق کابل کې یوې رسنۍ ته ویلي، د طالبانو او امریکايي پلاوي ترمنځ اووم پړاو خبرې بریالۍ دي او ټاکل شوې چې دواړه خواوې د جولای میاشتې په څلرویشتمه په وروستیو موافقو د لاسلیک لپاره بیا سره کېني.
د افغان سولې لپاره د امریکا ځانګړي استازي بیا واشنګټن کې د هند، جرمني له سفیرانو سره لیدلي دي او د افغان سولې پروسې په تړاو یې خبرې کړي دي.
خلیلزاد پر ټوېټر لیکلي، (( د سولې په پروسه کې د لا پرمختګونو لپاره چمتووالی نیسم. ))
امریکا ته د عمران خان سفر
ټاکل شوې سبا د پاکستان لومړی وزیر امریکا ته لاړ شي او هلته له ټرمپ سره د افغانستان پر وضعیت خبرې وکړي.
عمران خان په درې ورځني سفر امریکا ته ځي چې په دویمه ورځ به له ولسمشر ډونلډ ټرمپ سره وګوري.
پاکستاني کارپوهانو ویلي، پاکستان په افغانستان کې اغېز لري او طالبان او ځینې نور خلک د پاکستان خبرې ته غوږ نیسي چې د کارپوهانو په باور له همدې امله امریکا پاکستان ته اړتیا لري چې دغه موضوع حل شي او امریکايي ځواکونه له افغانستانه ووځي.
