طالبانو په میدان وردګو ولایت کې دوه څلوېښت روغتیايي مرکزونه تړلي دي.
افغانستان لپاره د سویډن کمېټې د یوې اعلامیې په خپرولو سره ویلي چې په میدان وردګو کې د افغان ځواکونو له خطرناکو بریدونو وروسته پرې طالبانو فشار راوستی چې دوی پورې اړوند روغتیايي مرکزونه وتړي.
سویډڼ کمېټې زیاته کړې چې تر اوسه یې د میدان وردګو په نهو ولسوالیو کې د اووه اویا روغیايي مرکزونو له ډلې دوه څلوېښت تړلي دي.
د سویډن کمېټې لیکلي چې د دغو روغتیايي مرکزونو په تړل کېدو سره د ماشومانو او ښځو په ګډون پنځه زره اووه سوه خلک له روغتیايي خدماتو بې برخې شوي دي.
دغه کمېټه د روغتیايي مرکزونو تړل کېدل د بشر حقونو خلاف عمل بولي او د جګړې له ټولو ښکېلو خواوو غواړي چې له هغو اعمالو لاس واخلي چې د خلکو ژوند له خطر سره مخ کوي.
طالبانو بیا ویلي، دغه روغتیايي مرکزونه یې د خلکو په غوښتنه تړلي دي. د طالبانو ویاند ذبیح الله مجاهد ویلي، سویډن کميټې د روغتیايي مرکزونو د کارکوونکو ژوند ته لازم تدابیر نه وو نیولي او اوس هم د مخنیوي لپاره یې تدابیر نه دي نیولي. مجاهد ویلي، ممکن دغه مرکزونه بېرته پرانیستل شي.
