نن شنبه په قطر کې طالبان او امریکایان د سولې په تړاو اووم پړاو خبرې پیلوي.
ویل کېږي د قطر په اووم پړاو خبرو کې د بهرنیو ځواکونو پر وتلو سر بېره د سولې له تړون وروسته د راتلونکي حکومت پر څرنګوالي هم بحث کیږي.
ظاهراً داسې ښکاري چې دواړه لوري دا ځل د خبرو میز ته له پوره چمتوالي سره راغلي، ځکه طالب استازو او زلمي خلیلزاد د سیمې یو شمېر هېوادونو ته سفرونه کړي او دواړه لوري له ډیر څه سره راغلي دي.
له افغانستان څخه د ټولو بهرنیو ځواکونو وتل او طالبانو له اړخه امریکا ته ډاډ ورکول د اووم پړاو خبرو ښکاره ټکي دي.
ها خوا امریکايي چارواکو ویلي، افغانستان کې د امنیتي ننګونو سره سره د سولې په برخه کې فرصت لري.
کابل ته د سفر پر مهال د امریکا بهرنیو چارو وزیر مایک پامپیو هیله څرګنده کړې وه چې ګنې له طالبانو سره به د سپټمبر میاشتې دمخه د سولې هوکړې ته ورسېږي.
د طالبانو ویاند ذبیح الله مجاهد شمشاد ته ویلي، که امریکا د ځواکونو اېستل ومني، دا امکان شته چې طالبان له امریکا سره د سپټمبر میاشتې دمخه د سولې هوکړې ته ورسېږي.
له دې سره افغانستان کې د ناټو ملکي استازي نیکولاس کې په بروکسل کې ویلي، افغانستان کې سولې ته د رسېدو لپاره فرصت کم پاتې دی او هیله مند دی چې د روان کال د سپټمبر میاشتې له پیل مخکې به له طالبانو سره د سولې یوه هوکړه وشي.
نیکولاس کې ویلي، یوازې د امریکا د بهرنیو چارو وزیر پامپیو نه دی چې وايي هیله مند دی، د سپټمبر میاشتې له پیل مخکې به د سولې هوکړه ترلاسه شي، بلکې په وینا یې دی له هر افغان همدا خبره اوري او دا یوه ګډه هیله ده.
تر دې وړاندې د امریکا د بهرنیو چارو وزیر مایک پامپیو تېره سه شنبه کابل ته د خپل سفر پرمهال هیله ښکاره کړه چې د سپټمبر میاشتې له پیل مخکې به له طالبانو سره د سولې یوه موافقه وشي.
