د امریکا او طالبانو د خبرو له لړۍ د مثبتو پایلو تمه نه کېږي.
د امریکا او طآلبانو له شپږ پړاوه بې پایلو خبرو وروسته اووم دور خبرې له خپل وخت زیاتې ځنډېدلي دي.
د ملا عبدالغني برادر په مشرۍ طالب پلاوی له تېرو څو ورځو را په دې خوا د سیمې په هېوادونو ګرځي او د امریکا استازی د راپورونو پراساس قطر ته رسېدلی چې اووم پړاو خبرې وکړي.
خو اووم پړاو خبرو ته تمه کېدای شي چې د افغان سولې برخلیک دې وټاکي؟
د طالبانو د وخت لوی څارنوال مولوي جلال الدین شینواری داسې وايي (( د امریکا په سیاسي حلقاتو کې نوي اظهارات او انکشافات ګورو، او دې خوا د طالبانو پخوانی دریځ چې پرې ولاړ دي او ټینګ دي، دې مساېلو ته په کتو سره مذاکرات ترینګلي او کمرنګه شوي دي.))
باور کېږي چې خلیلزاد به په اووم پړاو خبرو کې طالبانو سره د بهرنیو ځواکونو پر وتلو او له افغان خاورې نورو ته د ګواښ نه پېښېدو په تړاو بحث وکړي هغه دوه مسایل چې په شپږ پړاوه خبرو کې د بحث اساسي ټکي وو.
اوس خبرې له دې امله جنجالي پاتې چې امریکا او طالبانو د ګټو ترمنځ لوی تضاد وجود لري.
ورځپاڼه لیکونکی نظري پریاني داسې وايي (( دا خبرې کېدای شي ډېرې اوږدې شي، ځکه چې تر اوسه د جګړې د ښکېلو خواوو پېژندنه وجود نه لري، او ویلی شو چې د دوی ګټې په تضاد کې دي نو په همدې ترتیب د سولې تر ټولو جنجالي مذاکرات دي.))
طالبانو څو ځله وویل امریکا منلې چې له افغانستان څخه خپل پوځونه وباسي، خو زلمي خلیلزاد دغه موضوع رد کړې وه او په وینا یې امریکا له طالبانو سره د یوه جامع تړون په لټه کې ده.
نیوکه دا ده چې امریکا یوازې د طالبانو شرطونه او خبرې اورېدلي او له دې ور اخوا عملي څه په لاس نه شته.
د پوهنتون استاد نجیب ازاد داسې وویل (( د امریکا د متحده ایالتونو لخوا تر اوسه پورې چې زه خبر یمه هیڅ ډول کوم پلان نه دی شریک شوی، دا ددې باعث کېږي چې په هره ناسته کې نوې خبرې پيل شي او زه فکر کوم دا د همدې سبب شو چې طالبانو د نورو هېوادونو سره هم په ښکاره او پټ ډول خبرې شروع کړلې، چې دا د نورو هېوادونو په مستقیم ډول مداخله ده دافغانستان په چارو کې.))
د افغان سولې په اړه پاکستان کې هم یوه ناسته شوې چې پایلو ته یې چندانې هیلې نه شته دي.
تر اوسه د سولې په اړه شویو ناستو ښکاره پایله داده چې یوې ناستې بلې ته زمینه برابره کړې او له دې ور اخوا کوم بدلون نه شته.
